«Sıfrly Qazaqstan» memlekettik baǵdarlamasyn iske asyrý maqsatynda Túrkistan oblysy Túlkibas aýdanynda aýqymdy jumystar atqarylýda. Máselen, aýdan ákimdiginiń janynan zaman talabyna saı memlekettik qyzmettiń 95 túri boıynsha bir tereze qaǵıdasy arqyly qyzmet kórsetetin «Halyqtyq keńse» jumys isteýde.
Keńsede ákimdiktiń mamandary turǵyndarǵa keńes berip, qajetti qujattaryn rásimdeýge ádistemelik kómek kórsetedi. Al qoǵamdyq qaýipsizdikti saqtaý maqsatynda aýdanda 33 foto-beınejazba qurylǵylary ornatylǵan. Sonymen qatar, 14 aýyldyq okrýgtegi eldi mekenderde sanıtarlyq-tazalyq jumystaryna abonentik tólemaqyny «24 kassa» termınal júıesi arqyly tóleý múmkindigi jasalǵan. Termınaldar halyq kóp shoǵyrlanatyn jerlerge ornalastyrylǵan. Aýdandyq aýrýhanada naýqastardyń kezekte turýyn retteý maqsatynda emhanaǵa POST-termınal ornatylyp, dálizderine qosymsha 3 monıtor qoıyldy. Al, elektr qýatyn tıimdi paıdalaný jáne únemdeý maqsatynda, sońǵy tehnologııalarǵa súıene otyryp, aýdan aýmaǵyndaǵy «Tunǵysh Prezıdent» saıabaǵy, «Túrkibasy áýlıe», «Balalar» alańshalaryna jalpy sany 34 kún kózinen qýat alatyn aqyldy shamdar ornatyldy.
«Sıfrly Qazaqtan» baǵdarlamasy aıasynda aýdan mektepterin «Wi-Fi» jelisimen qamtý maqsatynda jergilikti bıýdjetten qarjy qaralyp, maksımaldy jyldamdyqtaǵy 50 dana «Wi-fi roýterlermen» aýdandyq bilim oshaqtary jabdyqtaldy. Sondaı-aq Maılykent aýyldyq okrýginde ornalasqan «Túlkibas avtobýs parki» JShS-da aýdanishilik baǵyttarǵa qatynaıtyn 18 shaǵyn avtokóliktiń 12-sine GPS qurylǵylary ornatylǵan. Múmkindigi shekteýli jandarǵa ortalyq kósheden ótýge yńǵaıly bolý úshin T.Rysqulov aýyly, T.Rysqulov kóshesi boıyna dybysty baǵdarshamdar ornatyldy. Bul baǵyttaǵy jumystar jalǵasyn tabýda.
Ǵalymjan ELShIBAI,
«Egemen Qazaqstan»
Túrkistan oblysy