Keshe Memleket basshysy Nursultan Nazarbaev Izraıl Prezıdenti Shımon Perespen telefon arqyly sóılesti.
Áńgimelesý barysynda ekijaqty yntymaqtastyqtyń qazirgi ahýaly men damý bolashaǵy talqylandy. Taraptar Izraıl Prezıdentiniń Qazaqstanǵa jasaǵan memlekettik sapary barysynda qol jetkizilgen ýaǵdalastyqtardy, sonyń ishinde joǵary tehnologııalar boıynsha birlesken qor qurýdy iske asyrýdyń mańyzdylyǵyn atap ótti.
Qazaqstan men Izraıl Prezıdentteri eki eldiń halyqaralyq jáne óńirlik uıymdardyń, atap aıtqanda, ústimizdegi jylǵy maýsym aıynda kezekti sammıti ótkiziletin AО́SShK aıasyndaǵy árekettestigi máselesin talqylady.
Áńgimelesýshiler sondaı-aq Taıaý Shyǵystaǵy ahýal tóńireginde sóz qozǵady, osy oraıda Qazaqstan Prezıdenti bul óńirdegi qaýipsizdik pen beıbitshilikti saıası-dıplomatııalyq jolmen qamtamasyz etý qajettigi jóninde pikir bildirdi.