Elimiz boıynsha kópbalaly otbasylardy baspanamen qamtamasyz etýge Úkimet aıryqsha kóńil bólip otyr. Bıyl birinshi jartyjyldyqta bul sanattaǵylarǵa 5391 páter beriledi. Bul týraly Astanada kópbalaly analarmen bolǵan kezdesýde Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov aıtty. Komıtet tóraǵasy tek mamyr aıynda kópbalaly analarǵa 2 myń páter beriletinin atap ótti.
Jalpy, elimizde turǵyndardyń áleýmettik turǵyda az qorǵalǵan toptaryna, kópbalaly otbasylar men analarǵa qoldaý kórsetý sharalary júıeli júrgizilip keledi. Memleket basshysy Nursultan Nazarbaev «Nur Otan» partııasynyń aqpan aıynda ótken kezekti HVIII sezinde kópbalaly otbasylar men áleýmettik az qamtylǵan azamattarǵa qoldaý kórsetýdi Úkimetke aıryqsha tapsyrǵan bolatyn. Atalǵan tapsyrmany júzege asyrý maqsatynda Úkimet naqty sharalardy qolǵa aldy. О́tken aptada áleýmettik salaǵa jaýapty vıse-premer Gúlshara Ábdiqalyqova basqarǵan top elimizdiń batys óńirin aralaǵan edi. Batystaǵy tórt oblysta ótken kezdesýlerde ataýly áleýmettik kómektiń erekshelikteri, bilim berý men densaýlyq saqtaý salasy qyzmetkerleriniń eńbekaqysyn kóterý jáne taǵy basqa da máseleler ashyq talqylanyp, laýazymdy tulǵalar turǵyndardyń saýaldaryna jaýap bergen-di.
Al keshe Eńbek jáne halyqty áleýmettik qorǵaý mınıstri Berdibek Saparbaev, Bilim jáne ǵylym mınıstri Kúlásh Shámshıdınova, Densaýlyq saqtaý vıse-mınıstri Lázzat Aqtaeva, Astana qalasynyń ákimi Baqyt Sultanov qaladaǵy kópbalaly analarmen kezdesti. Jıynǵa halyqty áleýmettik qorǵaý máselesine tikeleı nemese janama túrde qatysatyn qurylymdardyń basshylary da qatysty.
Kezdesýde kópbalaly otbasylarǵa kómek kórsetý tetikteri, 1 sáýirden bastap berile bastaıtyn ataýly áleýmettik kómektiń erekshelikteri, «Altyn alqa» jáne «Kúmis alqa» ıegerleri tárizdi kópbalaly analarǵa kórsetiletin járdemniń ataýly áleýmettik kómekti esepteý kezinde qalaı eskeriletini jaıly aıtyldy. Sonymen qatar kezdesýde kópbalaly otbasylardy baspanamen qamtamasyz etý máselesi de sóz boldy. Eńbek jáne halyqty áleýmettik qorǵaý mınıstri B.Saparbaevtyń aıtýyna qaraǵanda, baspana kezegine qatysty erejeler ózgerýi de múmkin eken. Atap aıtqanda, kópbalaly analardy baspana kezeginde jalpy tizimnen bólek tártippen qoıý máselesi de nazardan tys qalmaǵan. «Qazirgi kezde biz kópbalaly analar úshin bólek bir kezekti qurý máselesin pysyqtap jatyrmyz. Biraq ony birden jasaı almaımyz ǵoı. Bárin jan-jaqty qaraý qajet. Qansha qarjy kerek? Qansha baspana salý kerek? Sonyń bárin jan-jaqty qarastyramyz» dedi B.Saparbaev. Sonymen qatar mınıstr «Altyn alqa» ıegerleriniń turǵyn úı kezeginiń jalpy tizimine kirmeıtinin, olardyń ózgeshe statýsy bar ekenin atap ótti.
Al Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetovtiń aıtýyna qaraǵanda, 2019 jyly jalǵa beriletin jáne nesıelik turǵyn úılerdi iske qosý josparyna sáıkes el boıynsha 20563 páter berilmek. Onyń 5391-i jyldyń alǵashqy jartysynda óz ıelerin tappaq. Mamyrda kópbalaly otbasylarǵa berilýi tıis 2 myń páter de osy bes myńdyqtyń ishine kirip otyr. Sonymen qatar Úkimet kópbalaly otbasylar úshin 2 paıyzdyq ıpoteka berýdi de kózdep otyr. Bul ıpotekanyń alǵashqy jarnasy 10 paıyz bolmaq. Alǵashqy jarnanyń ornyna jergilikti ákimdikter beretin turǵyn úı sertıfıkatyn da paıdalaný múmkindigi bar. Astana qalasynyń ákimi Baqyt Sultanovtyń aıtýynsha, bıýdjettik uıym qyzmetkerlerine 2 myń turǵyn úı sertıfıkatyn berý kózdelgenin aıtty. Al ózge óńirlerde shama-sharqynsha mundaı sertıfıkattar usynylmaq.
Qysqasy, kópbalaly otbasylardy áleýmettik qoldaý jan-jaqty júrgizilmek. Sonyń ishinde olardy baspanamen qamtamasyz etý máselesi aldyńǵy qatarǵa shyǵyp otyr. Esterińizge salar bolsaq, elimizde 340 myńnan astam kópbalaly otbasy tirkelse, olardyń 28 myń 126-sy úı kezeginde tur.
Amangeldi QURMET,
«Egemen Qazaqstan»