Bul týraly Indýstrııa jáne ınfraqurylymdyq damý mınıstri Roman Sklıar Úkimet otyrysynda aıtty.
«Satyp alý quqyǵynsyz jalǵa beriletin turǵyn úılerdiń qurylysy úshin óńirlerge respýblıkalyq bıýdjetten 32,8 mlrd teńge qarastyrylǵan. Shamamen 4,5 myń páterdiń qurylysy josparlanýda», dedi Roman Sklıar.
Sonymen qatar Mınıstr Memleket basshysynyń «Nur Otan» partııasynyń XVIII sezinde bergen tapsyrmalaryn iske asyrý úshin 2019 jylǵa bıýdjetti aıqyndaý aıasynda kópbalaly otbasylar úshin jaldamaly turǵyn úıdiń qurylysyna jáne satyp alýǵa óńirlerge 50 mlrd teńge bólinetinin aıtty.
«Jalpy atalǵan is-sharaǵa 7 jyl ishinde 350 mlrd teńge qarastyrylǵan. Bul jyl saıyn 6 myń kóp balaly otbasyny pátermen qamtamasyz etýge múmkindik beredi. Iаǵnı, 7 jylda 40 myńnan astam páter beriledi degen sóz. Bul úshin búgin 25 mlrd. teńgeniń qurylys jobalar tizimi jasaldy. Daıyn páterlerdi satyp alý úshin 25 mlrd. teńge qarastyrylǵan. Bul kópbalaly otbasylardyń turǵyn úı máselelerin sheshýdi tezdetýge yqpal etedi. Lımıt somasy óńirlerdegi əkimdikterde kezekte turǵan kópbalaly otbasylardyń sanyna negizdeledi», dedi ol.
Aıta keteıik, respýblıka boıynsha 280 myńǵa jýyq áleýmettik álsiz otbasy kezekte tur. Olardyń ishinde 61 myń jetim, 104,2 myń tolyq emes jáne 28,1 myń kóp balaly otbasy bar.
Sondaı-aq Mınıstr «Túrkistan oblysynda 4 832 kópbalaly otbasy kezekte tur. Osyǵan baılanysty óńirge proporsıonaldy 8,6 mlrd teńge bólinýde. Bul qarajattan 4,3 mlrd teńge qurylysqa, qalǵan 4,3 mlrd teńge daıyn páter satyp alýǵa beriledi. Soltústik Qazaqstan oblysyndaǵy 342 otbasyǵa beriletin lımıt 700 mıllıon teńgeni quraıdy» dep atap ótti.