Qazaqstan Respýblıkasy Kásipodaqtar federasııasynyń tóraǵasy B.Ábdiraıym Úkimet otyrysynda bazalyq laýazymdyq qyzmetaqyny kezeńimen ósirýdi usyndy.
«Eńbek kodeksine sáıkes, ujymdyq shart – jumysshylardyń múddesin qorǵaıtyn jáne áleýmettik ádildik qaǵıdalaryn saqtaýdyń negizgi quraly.
Búgingi tańda elimiz boıynsha kásiporyndar men uıymdardyń nebári 40 % ǵana ujymdyq sharttarmen qamtylǵan. Alaıda sońǵy ýaqytta keıbir óńirlerden ujymdyq sharttar sanynyń ósý dınamıkasy baıqalady. Muny bir ǵana Almaty qalasynan kórýge bolady. Munda ótken jyly ǵana bekitilgen sharttardyń úlesi 4-ten 19 paıyzǵa artty», dep atap ótti «Eńbek qatynastaryn retteý jónindegi sharalar týraly» máselesi boıynsha Úkimet otyrysynda sóz sóılegen B.Ábdiraıym.
Sondaı-aq B.Ábdiraıym kásiporyn basshylaryn, bıznes-qaýymdastyqty, jergilikti atqarý organdaryn jalaqysy tómen qyzmetkerlerdiń eńbekaqylaryn satyly túrde arttyrýǵa shaqyrdy.
«Memleket basshysynyń tapsyrmalaryna saı sońǵy jartyjyldyqta eńbekaqyny arttyrýǵa qatysty sheshim eki ret qabyldandy. Atap aıtqanda, 2019 jyldan bastap eń tómengi jalaqy mólsheri 1,5 esege artty, al aǵymdaǵy jylǵy shilde aıynan bastap bıýdjet salasy qyzmetkerleriniń eńbekaqysy ósedi. Solaı bola tura, aýyl, orman sharýashylyǵynda jáne basqa da birqatar salada jumysshylardyń eńbekaqysy áli de tómen.
Qazir Úkimet bıýdjet salasyndaǵy tabys deńgeıin arttyrýdy qolǵa alyp jatyr. Osy rette biz halyqtyń ál-aýqatynyń áleýmettik standarttaryn arttyrýǵa qatysty Elbasy qoıǵan mindetterdi eskere otyryp, Úkimetke bıýdjet salasyndaǵy bazalyq laýazymdyq qyzmetaqyny eń tómengi jalaqyǵa kezeńimen aýystyrý múmkindigin qarastyrýdy usynamyz», dedi Kásipodaqtar federasııasynyń tóraǵasy.