Túrkistan oblysy Saıram aýdanynda jańadan murajaı salynyp jatyr. Aýdandyq qurylys bóliminiń tapsyrysy boıynsha boı kóterip jatqan nysannyń jalpy quny – 86 mln 492 myń teńge. 2018 jyldyń tamyz aıynda bastalǵan qurylys jumystary bıyl paıdalanýǵa beriledi dep josparlanǵan. Túrkistan oblysy ákiminiń baspasóz qyzmetiniń Saıram aýdanyna uıymdastyrǵan press-týry kezinde jýrnalıster osyndaı ıgi istiń kýási boldy. Bul týraly Túrkistan oblysy ákiminiń baspasóz qyzmeti habarlady.
«Mundaǵy sharýalar kúz aılarynda bastalǵan. Aýa raıyna baılanysty qurylys qarqyny azdap baıaýlady. Alaıda kúnniń erte jylynǵanyn paıdalanyp, tıisti jumystardy der kezinde atqaryp aldyq. Qazirgi tańda negizgi sharýalar aıaqtaldy, ishki árleý isine kiristik. Sátin salsa, sáýir aıynda paıdalanýǵa beriledi degen jospar bar. Qurylys jumystaryna jergilikti 26 azamat tartylǵan. Qoldanyp jatqan qajetti materıaldardyń barlyǵy ózimizdiń elden shyqqan ónimder», – dedi ýchaske bastyǵy Batyr Tólegenov.
Sala mamandarynyń sózinshe, murajaıdy salýdaǵy maqsat – tarıhy tereńde jatqan aýdandaǵy qundy jádigerlerdi, óńirdiń tarıhynan syr shertetin túrli tarıhı buıymdardy jınaqtap, bir jerge shoǵyrlandyrý. Zamanaýı úlgide boı kóterip jatqan ǵımaratta qundy dúnıelerdi uzaq saqtaý úshin murajaıǵa laıyq barlyq talaptar saqtalatyn bolady. Aıta keteıik, tarıhı ataýdy ıelengen aýdanda buryn-sońdy arnaıy salynǵan murajaı bolmaǵan.