Qoǵam nazaryna ilikken ózekti máselelerdi júıeli túrde sheship, jan-jaqty zerdeleý maqsatynda «Nur Otan» partııasy jańa jobany qolǵa aldy.
Memleket basshysynyń partııanyń XVIII sezinde atap ótken tapsyrmalary aıasynda júzege asa bastaǵan «Halyqqa kómek» jobasy jergilikti jerlerdegi problemalarǵa jedel áreket etýdi kózdeıdi. Atyraýdaǵy Jaıyq ózeninde qalyptasyp otyrǵan jaǵdaı da «Nur Otan» partııasynyń nazarynda.
«Nur Otan» partııasy oblystyq fılıaly tóraǵasynyń birinshi orynbasary Nurlybek Ojaev pen vedomstvoaralyq komıssııanyń tóraǵasy, oblys ákiminiń orynbasary Álibek Náýtıev ótken jyldyń jeltoqsan aıynda Jaıyq ózeninde balyqtyń qyrylý sebebin anyqtaýǵa jumyldyrylǵan memlekettik organdar basshylarynyń esepterin tyńdady.
Atyraýlyqtardy Jaıyqtaǵy balyq ólimi alańdatyp otyr. Osy oqıǵa boıynsha eki qylmystyq is qozǵaldy, tergeý júrip jatyr. Kóktem kelip, kún jylyna bastasymen ózen jaǵalaýyna balyq ólekseleri jınalyp qaldy. Partııanyń qoǵamdyq qabyldaýyna kóptegen turǵyndar múddeli organdardyń osy máseleni sheshý boıynsha atqaryp jatqan naqty sharalary jóninde halyqty aqparattandyryp otyrýdy surap habarlasqan.
- Partııa músheleri Jaıyq jaǵalaýyn qoqystan tazartýǵa arnalǵan jalpyqalalyq senbilikke qatysty. Bir kúnniń ishinde 52 tonna qoqys, 4,3 tonna óli balyq jınaldy,-dedi Nurlybek Ojaev.
Kezdesý barysynda ózende balyq qyrylýynyń sebepterin anyqtaý jaıy «Nur Otan» partııasynyń nazarynda ekeni jáne kún saıynǵy monıtorıng qortyndysy partııanyń oblystyq fılıalyna jiberiletini týraly aıtyldy.
- Bazarlarda, saýda oryndarynda balyq ónimderin satý núktelerine baqylaýdy kúsheıtý týraly tapsyrma berdik. Qazir jaǵdaı turaqty. Kún saıynǵy monıtorıng ózen sýynda normadan aýytqý joq ekenin kórsetip otyr. Satýǵa shyǵarylǵan jáne jańa aýlanǵan balyqtarǵa zerthanalyq synamalar buzýshylyqtardy anyqtamady. Medısınalyq mekemelerge balyq ónimderinen ýlaný, ınfeksııalyq aýrý deregimen túskender tirkelgen joq,-dep atap ótti Nurlybek Ojaev.
Veterınarlyq qyzmet balyq ónimderin satatyn 41 saýda núktesin baqylaýda ustap otyr. Balyq aýlaý ornynan satý núktesine deıingi jáne tutynýshyǵa jetkenge deıingi aralyqtyń bárine monıtorıng júrgiziledi.
Sondaı-aq, bıyl jazda Jaıyq ózenine ǵylymı zertteý jumysy bastalady. Jergilikti bıýdjetten osy maqsatqa 80 mln teńge qaralǵan. О́zen jaǵdaıy Mahambet aýdanynan bastap Kaspıı teńizine quıylatyn jerge deıin zertteledi degen jospar bar. Sol jumystardyń nátıjesinde múddeli organdarǵa naqty mindetter júkteledi.
Baqytgúl BABASh,
«Egemen Qazaqstan»
ATYRAÝ