Kim kimge de óz úıi, basybaıly baspanasy bolǵannan artyq baqyt joq. Atyraý oblysy Isataı aýdanynyń turǵyny Medet Supyǵalıev te osy jaıly armandaıtyn. Týa bitti meshel aýrýyna shaldyǵyp, múgedekter arbasyna tańylsa da, sportpen aınalysty, tipti halyqaralyq dárejedegi sport sheberi dárejesine deıin jetti.
Shańyraq kóterip, úsh balaly boldy. Taǵdyrdyń qatal syny onyń jigerin jasyta alǵan joq. Aýylda páter jaldap turyp jatqan qońyrqaı tirligine de razy edi. Ulyq meıram – naýryz toıy qarsańynda Supyǵalıevter otbasy kútpegen qýanyshqa keneldi. «Sazanquraq» JShS basshysynyń orynbasary, Atyraý qalalyq máslıhatynyń depýtaty, mesenat Álibek Semǵalıev úsh bólmeli páter kiltin tabystap, Medettiń ózin ǵana emes, bala-shaǵasyn, aǵaıyn-týysyn, aýyldastaryn qýantty.
- Medettiń taǵdyry týraly alǵash ret áleýmettik jeliden oqydym. Múmkindigi shekteýli azamattyń qaısarlyǵy, erik-jigeri tánti etti. Otbasyn quryp, sportta jetistikke jetýi, paralımpıadalyq jarystarda jeńis tuǵyrynan kórinýi úlgi bolarlyqtaı. Ár jerde páter jaldap júrgenin estigennen keıin kómek qolyn sozýdy uıǵardym. Elimizdiń taǵy bir otbasy baspanaly bolýyna úlesimizdi qosý – azamattyq paryzymyz», - deıdi Álibek Semǵalıev.
Aıta keteıik, mesenat ótken jyly da Atyraý qalasyndaǵy kópbalaly jalǵyzbasty ákege jeke úı alyp bergen bolatyn. Aınalasyndaǵy ahýalǵa alańdap, jaqsylyq jasaýǵa daıyn turatyn azamattardyń kóbeıip kele jatqany qýantady.
Baqytgúl BABASh,
«Egemen Qazaqstan»
ATYRAÝ