QazAqparat - Elordanyń «Qazmedıa» ortalyǵyna «Tumar» ulttyq televızııalyq báıgesiniń jeńimpazdary marapattaldy, dep habarlaıdy «QazAqparat» tilshisi.
Bıyl «Tumar» ulttyq baıqaýy 9 nomınasııa boıynsha úzdikterdi anyqtady.
«Úzdik óńirlik telejoba» atalymynda «Qazaqstan - Qyzyljar» telearnasynyń «WELCOME TO QYZYLJAR» jobasy jeńimpaz atandy. Bul joba Soltústik Qazaqstan óńiriniń tarıhı-mádenı oryndaryn tanystyrady.
«Úzdik áleýmettik joba» júldesi «Astana» telearnasynyń «Biz birgemiz. Ana úıi» jobasyna berildi. Jobada taǵdyrdyń tálkegine ushyrap, jalǵyz qalǵan jas analardyń shynaıy oqıǵalary jınaqtalǵan derekti fılmder toptamasy usynylady.
«Úzdik oıyn-saýyq jobasy» nomınasııasynda «NTK» arnasynda kórsetilgen «Qara beri» realıtı-shoýy úzdik dep tanyldy. Qara beri» hıp-hop jobasynda jas rep oryndaýshylary «Qazaqstannyń úzdik reperi» ataǵy úshin talasqa túsedi. Jeńimpaz Qazaqstandaǵy iri ortalyqpen kelisimshart bekitedi.
«Úzdik televızııalyq serıal» atalymynda «Keıki mergen», «Bessonnısa», «Krasnyı ýroven» jáne «Qarlyǵash uıa salǵanda» teleserıaldary úzddik tórtikke endi. Nátıjesinde KTK telearnasynyń «Krasnyı ýroven» teleserıaly marapattaldy.
Sonymen birge, Sırııaǵa ketken qazaqstandyqtardy qaıtarý týraly «Jýsan» jobasy úshin Qazaqstan teleradıokorporasııasyna «Tumar» ulttyq televızııalyq báıgesiniń arnaıy syılyǵy berildi.
«Úzdik derekti fılm» júldesi QR Prezıdenti Teleradıokesheni túsirgen «Uly dala astanasy» jobasyna berildi. 50 mınýttyq fılm Astananyń 20 jyldyq mereıtoıyna arnaıy túsirilgen.