Qurlyqtyq hokkeı lıgasynyń Gagarın kýbogynda «Avangardpen» kezdesken elordalyq «Barys» taǵy da utylyp qaldy.
Oıyndaǵy esepti «Avangard» oıynshylary ashty. Matchtyń 28-mınýtynda Aleksandr Iаremchýk qaqpany dál kózdedi.
Alaıda bir mınýttan keıin «Barys» esepti teńestirýge múmkindik aldy. Elordalyqtardyń qýanyshyna oraı, «Avangardtyń» hokkeıshisi aıdynnan qýylǵan bolatyn. Osy sátti utymdy paıdalana bilgen astanalyqtar qarsylastaryn qapy qaldyrdy. Esepti teńestirgen Mettıý Frettın.
Úshinshi kezeńde «Avangard» taǵy da alǵa shyqty. Maksım Chýdınovtyń alystan qaqyrata urǵan shaıbasyna «Barystyń» qaqpashysy tosqaýyl bola alǵan joq. 55-mınýtta «Avangard» taǵy bir shaıba soǵyp, kezdesýdegi basymdyǵyn aıqyndaı tústi. Gol avtory – Maksım Chýdınov.
Osylaısha, jalpy esep 3:1-ge jetti. Kelesi oıyn 22 naýryzda Astanada ótedi. Alda-jalda atalǵan kezdesýde «Barys» taǵy utylsa, týrnırmen qoshtasady.