Búgin qalalyq ákimdiktiń aldyndaǵy alańda el astanasyn Nur-sultan qalasy dep qaıta ataýǵa arnalǵan konsert ótti, dep habarlaıdy elorda ákimdiginiń resmı saıty.
Merekelik sharaǵa shyǵarmashylyǵy Qazaqstan astanasynyń damý tarıhymen tyǵyz baılanysty jas ártister qatysty. Estrada ártisteri, aspaptyq jobalar men bı ujymdary qalany qaıta ataýǵa qoldaý tanytty.
Qalalyq alańda qoǵam, mádenıet, sport sııaqty salalardyń ókilderi, stýdentter, elorda turǵyndary men qonaqtary jınaldy. Uıymdastyrýshylardyń málimetinshe aksııaǵa 800-ge tarta adam qatysqan.
Sahnada aǵaıyndy Júginisovter, Dos, «Gentlemen» toby, «Qaz Made» ınstrýmentaldy trıosy, «Di-Art Style», «Rahat Lýkým», «Shokolad» toptary, Aqtoty Bolysheva jáne Aınur Ábdıeva óner kórsetti.
Kelýshilerdi óziniń álemdik rekordyn elordanyń 20 jyldyǵyna arnaǵan qazaqstandyq palýan Sergeı Syrýlnıkov ta qýantty. 2018 jyldyń shildesinde Sergeı salmaǵy 37 tonna bolatyn teplovozdy 20 metrge súıregen-di. Búgin ol kórermenderge taǵy da birneshe jattyǵýdy kórsetti.
«Nursultan Ábishuly elordanyń onyń esimimen atalýyna laıyq. Jańa ataýǵa úırený astanalyqtar úshin qıyn. Birshama ýaqyt ótken soń, bári de retteledi dep oılaımyn», – deıdi S. Syrýlnıkov.
Elordany qaıta ataýǵa oraı shyǵarmashylyq zııaly qaýym, Qazaqstan halqy assambleıasynyń ókilderi, jastar uıymdarynyń kóshbasshylary, sport chempıondary qoldaý bildirdi.
«Búgin biz elordany Nur-sultan dep qaıta ataýdy qoldaý úshin jınaldyq. Men buny Ult kóshbasshysynyń otyz jyldyq eńbeginiń moıyndalýy dep bilemin. Men bizdiń kóp bolǵanymyzdy qalaımyn», – deıdi Qazaq tehnologııa jáne bıznes ýnıversıtetiniń stýdenti, «Astana arýy – 2018» baıqaýynyń jeńimpazy Erkenaz Seıfýlla.
«Men Tuńǵysh Prezıdentimizdi qoldaımyn da, qurmetteımin de. Men halyqaralyq arenada Qazaqstannyń namysyn qorǵaımyn. Nur-sultan Astana ataýyna qaraǵanda kóńilge qonymdy sııaqty. Sportshylar jańa ataýdy qoldaıdy. Bizdiń Tuńǵysh Prezıdentimiz soǵan laıyq», – deıdi bokstan Qazaqstannyń eńbek sińirgen sport sheberi, 2012 jyly Londonda ótken Olımpıadanyń qola júldegeri Marına Volnova.
«Barsha astanalyqtardy Naýryz meıramymen quttyqtaımyn! Qala endi Nur-sultan dep atalatyn boldy. Menińshe, onyń naǵyz ataýy – osy. Nur-sultan ataýynda «qalalardyń sultany», «shýaqty» degen maǵyna jatyr. «Nur-sultan» ataýynyń ózi de erekshe estiledi. Birinshiden, buǵan bizdiń Tuńǵysh Prezıdentimiz, Elbasy Nursultan Ábishuly Nazarbaev laıyq. Ol osy qalanyń jáne respýblıkamyzdyń damýyna eńbek sińirdi», – dedi M. Gorkıı atyndaǵy memlekettik akademııalyq orys drama teatrynyń dırektory Erkin Qasenov.