QMDB О́skemen aımaǵy ókildigi atalǵan basqarma tóraǵasy, Bas múftı Serikbaı qajy Oraz hazirettiń «Uly dala tósindegi Islam» kitabynyń negizinde «Rýhanı oryndarǵa sapar» atty shyǵarmashylyq jobasyn jarııalaǵan bolatyn. Shyǵys óńiriniń 9-10 synyp oqýshylary qatysqan bul baıqaýǵa kelip túsken materıaldardy tarıhshy, jýrnalısterden quralǵan qazylar alqasy muqııat saraptap, jeńimpazdardy anyqtady.
Shyǵys Qazaqstan oblystyq «Halıfa Altaı» meshitiniń baspasóz qyzmetiniń habarlaýynsha, baıqaý qorytyndysy boıynsha О́skemen qalasy №47 orta mektebiniń oqýshysy Shuǵyla Armııanova, Kúrshim aýdany N.Ostrovskıı atyndaǵy № 4 orta mektebiniń oqýshysy Ermekbaı Bekarys, О́skemen qalasy Abaı atyndaǵy №33 orta mektebi oqýshysy Aıman Amankeldi, Kúrshim aýdany Marqakól aýyly №5 mekteptiń oqýshysy Aqjan Tusaev, Tarbaǵataı aýdany Aqsýat aýyly orta mektebiniń oqýshysy Arna Talǵatqyzy, Glýbokoe aýdany Belýsovka aýyly №1 orta mektep oqýshylary Aqerke Beısenbekova, Erkejan Oralǵazına top jaryp, jeńimpaz atandy.
Shyǵys Qazaqstan oblystyq «Halıfa Altaı» meshitinde ótken júldegerlerdi marapattaý sharasynda QMDB О́skemen aımaǵynyń ókil ımamy Ermek Qasbolatuly «Jeńimpaz oqýshylar ózderiniń tereń tanymdyq bilimimen ozyp shyǵyp, Uly dalanyń kıeli oryndaryn aralaý múmkindigine ıe bolyp otyr. «Jastar jylynyń» aıasynda osynaý rýhanı sapar jobasyn uıymdastyryp otyrmyz» deı kele, júldegerlerge sapar joldamasyn tabys etti. Jıynda oqýshylardyń ata-analary osynaý baıqaýdyń úlken tanymdyq shara bolǵandyǵyn atap, ókildikke alǵystaryn bildirdi.
Júldeger oqýshylar tobyn Kúrshim aýdany Marqakól mektebiniń ustazy, bilikti jas maman, tarıhshy Nazerke Tileýbaeva bastap, Almaty-Taraz-Shymkent-Túrkistan baǵytyna saparǵa attandy.
Júldegerlerge «Rýhanı sapardyń» barlyq shyǵyndaryna ókildik tarapynan demýshilik jasaldy. Oqýshylar 1 apta boıy kıeli jerlerdi aralap qaıtady dep josparlanyp otyr.
Azamat QASYM,
«Egemen Qazaqstan»
О́SKEMEN