О́ńirlik kommýnıkasııalar qyzmetinde ótken baspasóz konferensııasynda QR QM Memlekettik kirister komıteti Qyzylorda oblysy boıynsha memlekettik kirister departamentiniń basshysy Serik Mustafaev salyqtyq raqymshylyq jaıynda aıtty.
Shaǵyn jáne orta kásipkerlik ókilderiniń qordalanǵan qaryzynyń eleýli bóligin ósimaqy jáne aıyppuldar quraıdy. Negizgi salyqtan qaryzyn óteýden soń kásipkerdiń kásibin jalǵastyrýǵa, jańa kásip túrine aýysýǵa, jańa ıdeıalary men bastamalaryn júzege asyrýǵa múmkindigi paıda bolady.
«2018 jyldyń 1 qazanyna salyqtan qaryzy bar shaǵyn jáne orta bıznes ókilderine raqymshylyq jasaý úshin eshqaıda barýdyń qajeti joq. Memlekettik kirister organdary kún saıyn derbes shottardyń jaı-kúıine monıtorıng júrgizip, negizgi qaryzdy tóleý kezinde úsh jumys kúninen keshiktirmeı esepten shyǵarý týraly tıisti sheshim shyǵarady», dedi S.Mustafaev.
Qyzylorda oblysynda raqymshylyqty paıdalanýǵa múmkindigi bar tulǵalar sany – 1851, olardyń 2018 jyldyń 1 qazanyna jalpy bereshegi 5,3 mlrd.teńgeni quraǵan. Onyń 3,5 mlrd teńgesi negizgi qaryzdary, 1,6 mlrd teńge ósimpul jáne 200 mln. teńge aıyppul. Al, 2019 jyldyń 19 naýryzyna bizdiń oblystan 913 tulǵa 175 mln teńge kóleminde negizgi qaryzyn ótep otyr. Olardyń 20,1 mln teńge ósimaqysy esepten shyǵaryldy.
Baqtııar TAIJAN,
«Egemen Qazaqstan»
Qyzylorda oblysy