Nur-Sultanda Qazaqstan Respýblıkasy Ulttyq Olımpıadalyq komıtetiniń Bas hatshysy Sáken Musaıbekov pen Qazaqstandaǵy Japonııanyń Tótenshe jáne О́kiletti elshisi Tasýkıho Kasaı kezdesý ótkizdi. Kezdesý barysynda 2020 jyly 24 shilde men 9 tamyz aralyǵynda Tokıoda ótetin Olımpıada oıyndaryna daıyndyq barysy talqylanyp, eki tarap bir-birimen keńirek tanysty dep jazady Olympic.kz.
«Qazirgi tańda QR UOK prezıdenti Tımýr Qulybaevtyń tapsyrmasymen elimizdiń olımpıadalyq komıteti 2020 jylǵy Olımpıada oıyndaryna ulttyq qurama komandalardy maqsatty túrde daıyndaýǵa kóshti. Búginge deıin Qazaqstan tarapy Japonııamen áriptestik ornatyp úlgerdi. QR UOK pen Japonııanyń Fýkýoka, Kashıhara jáne Ibarakı prefektýralary arasynda kelisim ornatylyp, Qazaqstan sportshylary Japonııadaǵy klımat jaǵdaıyna beıimdelip, oqý-jattyǵý jıyndaryn ótkize bastady», - dep atap ótti QR UOK bas hatshysy Sáken Musaıbekov.
Qazaqstan UOK sportta dopıng qoldanýǵa «nóldik tózimdilik» baǵytyn ustanady, sondaı-aq, elimizdegi sporttyq medısınanyń damýyna múddeli. Osy oraıda, QR UOK Bas hatshysy Japonııada medısına men farmasevtıka salasynyń alǵa basqanyn aıta kele, osy salada áriptestik ornatý týraly usynys bildirdi. Japonııa elshisi bul suraqqa tolyǵymen qyzyǵýshylyq tanytyp, atalǵan usynys boıynsha barlyq múmkindikterdi qarastyratynyn jetkizdi.
Jıyn sońynda QR UOK Bas hatshysy Tasýkıho Kasaı myrzany Qazaqstandaǵy elshi qyzmetine taǵaıyndalýymen taǵy bir márte quttyqtap, ári qaraı áriptestik deńgeıin kótere túsýge tilektestik bildirdi. Sondaı-aq, Qazaqstan sportshylaryna Tokıodaǵy Olımpıada oıyndarynda sáttilik tiledi.