Bul týraly Densaýlyq saqtaý mınıstri Eljan Birtanov "Qazir bul ınsýlındi zańsyz jetkizgender anyqtaldy, tergeý júrip jatyr. О́kinishke qaraı, biz muny jarııa ete almaımyz. Bizdegi aqparat boıynsha quqyq qorǵaý organdary tergeýdi bastap ketti", - dedi mınıstr úkimette ótken jıynda.
Osy oraıda E.Birtanov atalǵan máselege baılanysty 2018 jyly jan-jaqty saraptama júrgizilgenin aıtty.
«Problemany anyqtap, ótken jyldyń kókteminde quqyqqorǵaý organdaryna berdik. Bul faktilerdi sońǵy ýaqytqa deıin quqyqqorǵaý organdarymen, Bas prokýratýramen birge tekserdik. 28 qylmystyq is qozǵaldy. Mán-jaıyn quqyqqorǵaý organdary habarlaıtyn bolady», - dedi ol. Onyń dereginshe, qazirgi ýaqytta tekserý sharalarynyń ekinshi kezeńi bastaldy. «Qazirgi ýaqytta narkologııalyq, psıhıatrııalyq, týberkýlezge qarsy dıspanserlerde, VICh ortalyqtarynda tekserýdiń ekinshi kezeńin júrgizip jatyrmyz. Bul qorytyndy alqa jınalysynan keıin bergen tapsyrmam. Qazirdiń ózinde tıimsiz josparlaý faktileri anyqtalyp jatyr. Munyń barlyǵyn anyqtaýǵa qyzmetterdi sıfrlandyrý múmkindik beredi. Bul jumystardy odan ary da jalǵastyramyz», - dedi ol. Aıta keteıik, QR Bas prokýrorynyń orynbasary Andreı Lýkın Qazaqstan azamattaryna arnalǵan ınsýlındi О́zbekstanǵa satý faktisi boıynsha prokýratýra tekserý júrgizip jatqanyn málim etken bolatyn. QR Densaýlyq saqtaý mınıstrligi Farmasııa komıtetiniń tóraǵasy Lıýdmıla Bıýrabekova da qazaqstandyqtarǵa arnalǵan ınsýlınniń О́zbekstanda satylyp jatqanyna baılanysty aqparatqa pikir bildirgen edi. «Insýlınder biryńǵaı dıstrıbıýtor (SK-Farmasııa) arqyly satyp alynyp, Qazaqstannyń tikeleı medısınalyq uıymdaryna kelip túsedi. Ol jerde ınsýlınder resept retinde jazylyp, pasıentterdiń qolyna tapsyrylady. О́tken jyly biz bólshek saýda jelisinde biryńǵaı dıstrıbıýtor arqyly alynǵan osyndaı preparattardyń satylý jaǵdaılaryn anyqtaǵan bolatynbyz. Bul faktiler týraly quqyq qorǵaý organdaryna da habar berdik. Biz pasıentterdiń sol preparatty alǵanynan nemese basqa jerge (О́zbekstandaǵy dárihanalarǵa) satqanynan habarymyz joq. Bolmasa ol preparattar syzylyp tastalyp, medısınalyq uıymdardan alynyp ketken. Basqa organdar men prokýratýra naqty osy istiń mán-jaıyn anyqtaý ústinde», - degen edi Lıýdmıla Bıýrabekova.
Eske sala ketsek, osy jyldyń basynda Tashkent jýrnalısteri dárihanalardan qazaq tilinde tańbalanǵan ınsýlın satylyp jatqanyn habarlaǵan edi.