Qazaqstan áskerı-teńiz kúshteriniń tarıhyna sheginis jasap kóretin bolsaq, 1993 jyldyń 2 sáýirinde QR Prezıdentiniń Jarlyǵymen qurylǵan-dy. Bastapqyda Aqtaý qalasynda áskerı-teńiz bazasynda qurylǵan áskerı-teńiz bazasy 1999 jyldyń shilde aıynda Qazaqstan Respýblıkasy UQK Shekara qyzmeti Teńiz bólimderiniń quramyna kirdi. 2003 jyldyń 7 mamyrynda Qazaqstan Respýblıkasy Prezıdentiniń «Qazaqstan Respýblıkasy Qarýly Kúshteriniń qurylymyn odan ári jetildirý jónindegi sharalar týraly» №1085 Jarlyǵy shyqty. Osy sátten bastap Áskerı-teńiz kúshteri Qazaqstan Respýblıkasy Qarýly Kúshteriniń jeke baǵyty retinde qalyptasty.
Búginde Kaspıı óńiri Qazaqstannyń ekonomıkasy úshin mańyzdy aımaq bolyp tabylady. Kaspıı teńiziniń qazaqstandyq bóliginde respýblıkanyń memlekettik shekarasyn, aýmaqtyq tutastyǵyn, egemendigi men ekonomıkalyq múddelerin qorǵaýdy basty nazarynda ustaıtyn áskerı-teńiz sarbazdary qarýly qaqtyǵystardy oqshaýlaý jáne aldyn alýǵa atsalysý, porttyq aımaqty, munaı tabý nysandary ornalastyrylǵan jasandy araldar jáne platformalardy qosa alǵanda sýly aýdandardy qorǵaý jáne kúzetý, t.b. memleket qaýipsizdigi úshin erekshe nysandar boıynsha qyraǵy kúzette turady. Memleketimizdiń táýelsizdigi jyldarynda Áskerı-teńiz kúshteri qajetti tájirıbe jınaqtap, memleketimizdiń áskerı qaýipsizdigin qamtamasyz etý múddesinde jaýyngerlik jáne jumyldyrý ázirligin jetildirip keledi. Búginde Áskerı-teńiz kúshteri Kaspıı mańyndaǵy elder arasynda kúshterdi ornalastyrýda aıryqsha orynǵa ıe ekenin jáne óńirdegi turaqtylyqtyń kepili deýge negiz bar.