Aýyl sharýashylyǵy vıse-mınıstriniń aıtýynsha, Qazaqstan negizgi azyq-túlik ónimderi boıynsha ishki qajettilikterin tolyq óteıdi. Endi óndiristi ulǵaıtý jáne sheteldik ótkizý naryqtaryna shyǵý mindeti tur.
«Biz ózimiz úshin jetkilikti ónim shyǵaramyz, al óndiris kólemin ulǵaıtý úshin bizge basqa elderdiń naryqtaryna shyǵý kerek», — dedi ol.
Alaıda, ımportqa táýeldilik máselesi birneshe ónim túri boıynsha ózekti bolyp otyr. Atap aıtqanda, ol qus eti, keıbir jemis túrleri, balyq jáne t. b.
«Qazir biz broılerlik baǵyttaǵy qus fabrıkalaryn belsene nesıelendirip, salyp jatyrmyz, bul qus eti óndirisiniń kólemin arttyrý úshin jasalýda. Sonymen qatar jemister, naqty aıtqanda, almalar men almurttar óndirisin damytý, teńiz, muhıt balyǵy ımporty baǵdarlamasy bar, sebebi Qazaqstan tek ózen balyǵy men akvakýltýrany shyǵarady», — dedi G. Isaeva.
Qazirgi kezde vedomstvo otandyq óndiristiń damýyna yqpal etetin eki jol kartasyn ázirledi.
«Bul organıkalyq ónimderdi damytýdyń Jol kartasy, onda biz basqa memlekettik organdarmen birlesip sheshilýi tıis máselelerdi qoıamyz. Mysaly, Indýstrııa jáne ınfraqurylymdyq damý mınıstrligimen birlesip biz organıkalyq ónim máseleleri boıynsha akkredıtteý jáne sertıfıkattaý máselelerin sheshýge tıispiz, Aqparat jáne qoǵamdyq damý mınıstrligimen birlesip halal ónimderi máselesin sheshetin bolamyz. Mysaly, biz musylman elderine eksport kólemin arttyrý mindetin qoıyp otyrmyz», — dedi aýyl sharýashylyǵy vıse-mınıstri.
Bul oraıda G. Isaeva atap ótkendeı, musylman naryqtaryna eksport ónimderdiń ár partııasyn «halal» talaptaryna sáıkestigine sertıfıkattaý júrgizilgen jaǵdaıda ǵana múmkin bolady. Bul naryqtyń erekshelikterin eskerý qajet, óıtkeni qazaqstandyq kásiporyndardyń basym bóligi malaızııalyq «halal» standartynyń sertıfıkattaryna ıe. Búgingi tańda túrli elderde standarttardyń túrli talaptary bar, osy Jol kartasy barlyq sáıkessizdikterdi eskerýge múmkindik beredi.
«BAÁ naryǵynda ózderiniń standart talaptary bar ekenin bilemiz, sondyqtan da Jol kartasy barlyq jaǵdaıdy kórsetip turady. Ony iske asyrý jáne karta aıasynda fermerlerge josparlanǵan kómek bizge eksport kólemin ulǵaıtyp, eń bastysy, fermerlerge óz ónimderin premıým sanatynyń ónimi retinde joǵary baǵaǵa satýǵa jol ashady dep oılaımyn», — dep túıindedi G. Isaeva.