Ashyq, dostyq jáne syndarly jaǵdaıda ótken kelissózder barysynda memleketter basshylary ekijaqty qarym-qatynastardyń negizgi máselelerin, Eýrazııalyq ekonomıkalyq odaq (EAEO) sheńberindegi yntymaqtastyqty, sondaı-aq ózara múddeli ózekti óńirlik jáne halyqaralyq problemalardy muqııat talqylady.
Eki eldiń saıası, saýda-ekonomıkalyq, qorǵanys jáne áskerı-tehnıkalyq, mádenı-gýmanıtarlyq salalardaǵy ózara yqpaldastyǵyn turaqty oń dınamıkasyn qanaǵattanǵandyqpen atap ótip, 1992 jylǵy 25 mamyrdaǵy Qazaqstan Respýblıkasy men Reseı Federasııasy arasyndaǵy Dostyq, yntymaqtastyq jáne ózara kómek týraly shartta, 1998 jylǵy 6 shildedegi Qazaqstan Respýblıkasy men Reseı Federasııasy arasyndaǵy HHI ǵasyrǵa baǵdarlanǵan máńgilik dostyq pen odaqtastyq týraly deklarasııada jáne de 2013 jylǵy 11qarashadaǵy Qazaqstan Respýblıkasy men Reseı Federasııasy arasyndaǵy XXI ǵasyrdaǵy tatý kórshilik pen odaqtastyq shartynda negizi qalanǵan prınsıpter men mindettemelerge buljymas beıildiligin rastaı otyryp,Qazaqstan Respýblıkasy Prezıdentimen Reseı Federasııasynyń Prezıdenti tómendegiler týraly málimdeıdi:
Qazaqstan Respýblıkasy men Reseı Federasııasy ózara senim,strategııalyq seriktestik jáne jan-jaqty yntymaqtastyq negizinde teńquqyly jáne egemen memleketter retinde odaqtastyq qatynastardy jáne ıntegrasııalyq ózara yqpaldastyqty damyta otyryp, bul rette memlekettik egemendik pen táýelsizdikti ózara qurmetteý, teń quqylyq jáne ishki isterge aralaspaý, kúsh nemese kúsh qaýpin qoldanbaý, memleketterdiń aýmaqtyq tutastyǵy, shekara myzǵymastyǵy, daýlardy beıbit jolmen sheshý, halyqaralyq mindettemelerdi adal oryndaý, adam quqyqtary men negizgi bostandyqtardy qorǵaý prınsıpterin basshylyqqa alady.
Qazaqstan-Reseı qatynastary bizdiń elderimiz halyqtarynyń tereń tarıhı jáne rýhanı baılanystaryna negizdelgen. Olar eki memlekettiń ulttyq múddelerine saı keledi, olardyń azamattarynyń ál-aýqaty men ómir sapasyn arttyrý, turaqty áleýmettik-ekonomıkalyq damý, ınnovasııalyq tehnologııalardy keńinen engizý bazasyndaǵy ulttyq ekonomıkalardyń básekege qabilettiligin kúsheıtý, eńbek resýrstaryn utymdy paıdalaný, adam áleýetin meılinshe tolyq ashý mindetterin sheshýge járdemdesedi. Bul Qazaqstan men Reseıge jahandaný jaǵdaıynda óz ustanymdaryn barynsha kúsheıtýge, Eýrazııa keńistiginde jáne búkil álemde qaýipsizdik pen turaqtylyqty nyǵaıtýǵa járdemdesýge múmkindik beredi.
Eki memleket arasyndaǵy qarym-qatynastardyń serpindi damýy úshin nysanaly jáne ashyq saıası dıalogtyń mańyzdylyǵyn moıyndaı otyryp, prezıdentter joǵary, bıik jáne basqa da deńgeılerdegi senimgerlik jáne syndarly baılanystardy odan ári keńeıtýdi jaqtaıdy.
Eki eldiń óńiraralyq jáne transshekaralyq yntymaqtastyǵynyń áleýetin baǵalaı otyryp, prezıdentter Qazaqstan Respýblıkasynyń ákimshilik-aýmaqtyq qurylymdary men Reseı Federasııasynyń sýbektileri arasyndaǵy kópqyrly ekonomıkalyq jáne gýmanıtarlyq qatynastardy keńeıtýdi, múddeli sharýashylyq júrgizýshi sýbektilerdiń tikeleı baılanystaryn damytý men nyǵaıtý úshin qajetti jaǵdaılar jasaýdy jaqtady.
Memleket basshylarynyń qatysýymen ótetin Qazaqstan men Reseı arasyndaǵy óńiraralyq yntymaqtastyq jónindegi jyl saıynǵy forýmdar jáne olardyń eki eldiń isker toptarymen kezdesýleri ekijaqty ózara yqpaldastyqty jandandyrýdyń pármendi tetigi retinde tanyldy. Kezekti XVI forýmdy 2019 jyldyń sońynda ótkizý týraly ýaǵdalastyqqa qol jetkizildi.
Qazaqstan-Reseı ózara yqpaldastyǵyn nyǵaıtýǵa bıliktiń zań shyǵarýshy jáne atqarýshy organdarynyń arasyndaǵy júıe boıynsha turaqty iskerlik baılanystar járdemdesedi.
Taraptar «Baıqońyr» kesheni jónindegi Qazaqstan-Reseı úkimetaralyq komıssııasynyń sheńberindegi, sonyń ishinde «Báıterek» ǵaryshtyq zymyran keshenin salýdyń birlesken jobasyn iske asyrý boıynsha yntymaqtastyǵyn jalǵastyrady.
Taraptar EAEO áleýetin tıimdi paıdalanýǵa qol jetkizýge umtylysty sıpattaıtyn yntymaqtastyqtyń qaryshty damýyn atap ótedi, 2014 jylǵy 29 mamyrdaǵy Eýrazııalyq ekonomıkalyq odaq týraly sharttyń negizgi erejeleri men qaǵıdattaryn iske asyrý mańyzdylyǵyn rastaıdy.
Bizdiń elderimiz, birlesken bilim berý jáne ǵylymı-tehnıkalyq baǵdarlamalar men jobalardy qosa alǵanda, bilim berý jáne ǵylymı uıymdar arasyndaǵy tikeleı baılanystardy damytýdy kótermeleýge, ǵylymı jáne pedagog kadrlar daıarlaý salasynda qolaıly jaǵdaılar jasaýǵa, oqytýshylar men stýdenttermen almasýdy qarqyndy túrde arttyrýǵa nıetti.
Árbir Tarap óz aýmaǵynda turatyn basqa Taraptyń halyqtarynyń etnıkalyq, tildik, mádenı jáne dinı erekshelikterin saqtaý jáne damytý úshin tyǵyz yntymaqtastyqty nyǵaıtý, Taraptardyń zańnamasyna sáıkes olardyń ókilderiniń qoǵamdyq-saıası, mádenı jáne áleýmettik-ekonomıkalyq ómirge belsendi qatysýyna jaǵdaılar jasaý nıetterin rastady.
Qazaqstan men Reseı Taraptardyń biri múshe bolyp tabylatyn halyqaralyq uıymdarǵa jáne rejımderge qatysý nemese qosylýǵa bir-birine qoldaý kórsete otyryp, beıbitshilikti, halyqaralyq turaqtylyq pen óńirlik qaýipsizdikti nyǵaıtý isinde ózara is-qımyl jasasady, Birikken Ulttar Uıymy, Táýelsiz Memleketter Dostastyǵy, Ujymdyq qaýipsizdik týraly shart uıymy,Azııadaǵy ózara is-qımyl jáne senim sharalary jónindegi keńes,Shanhaı yntymaqtastyq uıymy jáne basqa da uıymdar men ınstıtýttar alańdarynda úılesimdi jumys atqarady.
Nur-Sultan men Máskeý terrorızm men ekstremızmge, dinı tózbeýshiliktiń, ksenofobııanyń, ultshyldyqtyń jáne neonasızmniń zorlyq kórinisterine, transshekaralyq uıymdasqan qylmysqa, qarý-jaraq, esirtki jáne olardyń prekýrsorlarynyń zańsyz aınalymyna, sondaı-aq basqa da jańa syn-tegeýrinder men qaýip-qaterlerge qarsy kúres máselelerinde ortaq ustanymmen shyǵady.
Qazaqstan men Reseı bizdiń odaqtastyq qatynastarymyzdyń, eń mańyzdy negizi bolyp tabylatyn ortaq tarıhymyzdy,eń aldymen, Ekinshi dúnıejúzilik soǵys tarıhyn burmalaý, qaıta jazý jáne «qaralaý» áreketterin qosh kórmeıdi.
Saıası baǵytta prezıdentter «Astana prosessi» aıasynda halyqaralyq quqyqtyń jalpyǵa birdeı tanylǵan qaǵıdattarymen normalary sózsiz saqtalýy jaǵdaıynda Sırııa qaqtyǵysyn beıbit retteý kúsh-jigerlerdi jalǵastyrýǵa sheshim qabyldady.
Taraptar Ujymdyq qaýipsizdik sharty uıymy jelisi boıynsha ujymdyq qaýipsizdikti qamtamasyz etý men daǵdarystyq jaǵdaılarǵa den qoıýdyń pármendi júıesin qurýǵa baǵyttalǵan birlesken sharalar qabyldaıdy.
Qazaqstan men Reseı prezıdentteri eki memleket arasyndaǵy odaqtastyq jáne strategııalyq seriktestikti odan ári tereńdetý, olardyń turaqty damýy men halyqaralyq arenadaǵy bedelin arttyrýǵa járdemdesý maqsatynda qol jetkizgen ýaǵdalastyqtardy tıimdi iske asyrýdy qamtamasyz etý nıetin rastaıdy.
Memleketter basshylary jemisti kelissózder men sapar barysynda qol qoıylǵan ekijaqty qujattar Qazaqstan Respýblıkasy men Reseı Federasııasy arasyndaǵy dástúrli dostyq, teńquqyly qatynastardyń, sondaı-aq eki el halyqtarynyń arasyndaǵy baýyrlastyq jáne tatý kórshilik baılanystardyń qaryshty damýyna járdemdesetinin atap kórsetti.
Máskeý, 2019 jylǵy 3 sáýir