Jaqynda el Prezıdenti Qasym-Jomart Toqaev óńirler ákimderimen ótkizgen keńes barysynda halyqtyń jaqsy ómir súrýine tikeleı yqpal etetin ınfraqurylymdyq sıpaty bar júıeli máselelerdi sheshýge aıryqsha nazar aýdarý qajettigin atap ótken edi. TÚKSh salasyndaǵy bul problemalar - jylý, sýmen qamtý joldar, gazdandyrý, ekologııa jáne qaýipsizdik.
Qalanyń kommýnaldyq ınfraqurylymyn jańartý barysynda sońǵy birneshe jyl ishinde ǵana 2 myń kılometrge jýyq ınjenerlik kommýnıkasııa jóndeldi. Bıylǵy jyly taǵy 618 km jelini salý jáne jóndeý josparlanǵan, onyń ishinde 160 km elektr, 223 km gaz, 10 km jylý jelileri jańarady. 52 myńnan astam qala turǵyndaryn sapaly sýmen jáne ony tartýmen qamtamasyz etý úshin 12 km sý qubyrynyń jáne 105 km kárizdiń qurylysy aıaqtalady.
Naýryzbaı aýdanynda 107,5 km sý qubyryn jáne 81 km sý tartýdyń, Aqsaı men Qarǵalydaǵy fıltrli tazartqysh eki stansany salýdyń JSQ jasalýda. Quramys, Taýjoly, Jaılaý eldi mekenderinde sý jelilerin salýdyń JSQ daıyn. Bul jobalardy júzege asyrý bıylǵy jyly bastalady jáne 140 myńǵa jýyq turǵyn sapaly sýmen qamtamasyz etiledi.
Qalaǵa qosylǵan eldi mekenderdegi 28 myńnan astam turǵyndy sýmen jáne kárizben qamtamasyz etý úshin buryn 560 km ınjenerlik jeliler salynyp, rekonstrýksııalandy. Degenmen, komıssııalardyń baryp tekserýleriniń jáne qala turǵyndarynyń ákimdiktiń elektrondy «Open Almaty» qoǵamdyq qabyldaýyna túsken shaǵymdarynyń negizinde merdigerlik uıymdardyń óz mindetterine nemquraıdy qarap, jumysty sapaly atqarmaǵandary anyqtaldy.
Qala ákimi tıisti vedomstvolar tarapynan qatań baqylaý jasaýdy, bir aı ishinde kemshilikterdi joıýdy, ótken jyldyń ótpeli obektilerin 30 shildege deıin iske qosýdy tapsyrdy.
Qala turǵyndarynyń qaýipsizdigin qamtamasyz etý úshin barlyq merdigerlik uıymdar jumys kezinde arnaıy qorshaýlar men ótpeli traptar, belgiler, baılanys nómirleri jazylǵan pasporttar ornatýlary tıis. Ár ýchaskeniń naqtyly merzimi, munda jumys jasaıtyn tehnıkalar men jumysshylar sany belgilengen. Eger merdigerler normalardy saqtamaıtyn bolsa, onda aıyppul sanksııalary salynady.
Almaty ákimi jóndeý jumystary kezinde ótinishterdi jedel qaraý maqsatynda burynnan bar keri baılanys kanaldarymen qosa ár aýlada tanymal messendjerlerde turǵyndarmen birge arnaıy chat-toptaryn qurýdy, olardyń quramyna aýdan ákimdikteriniń, basqarmalar men merdigerlik uıymdardyń jaýapty ókilderin engizýdi tapsyrdy.
Aıta keterligi, buryn «Nur Otan» partııasy qalalyq bıýrosynyń otyrysynda Baýyrjan Baıbek megapolıstiń shet aımaǵyndaǵy joldardy abattandyrý, salý jáne jóndeý jumystarynyń qarqynyn kúsheıtýdi tapsyrǵan edi. Mysaly, Alataý aýdanyndaǵy «Aqbulaq», «Qarasý», «Uljan-2», «Alǵabas-AZTM», «Áıgerim-1», «Áıgerim-2», «Uljan-1», «Shańyraq-1», «Shańyraq-2», «Tomırıs», «Darhan-Baıbesik», «Kók Qaınar» yqsham aýdandarynda uzyndyǵy 120 km bolatyn 440 kóshede joldy jóndeý jáne salý jumystary bastaldy.
Bulardan ózge, qalanyń barlyq kópqabatty úıleriniń 50%-yn qamtı otyryp, taǵy 680-nen astam aýlany jóndeý josparlanǵan. Sáýirdiń ortasynan bastap 120-dan astam kóshe ortasha jóndeledi, jergilikti pıtomnıkterde ósirilgen 12 myń aǵash otyrǵyzylady. Qalanyń shet aımaǵyndaǵy saıabaqtar, skverler men júrginshi aımaqtary abattandyrylady.
Jalpy, 2015 jyly kópshiliktiń qatysýymen talqylanǵan «Almaty-2020» qalalyq damý Baǵdarlamasy barysynda megapolıste tarıhı ortalyqtyń 60%-y, 600-ge jýyq kóshe,1400-den astam eski aýlalar jóndeldi. Qalanyń barlyq jer asty ótpeli joldary qaıta jasaldy. Kóshedegi jaryq kózderiniń úshten biri dıodty jáne energııa jınaqtaǵysh shamdarǵa aýystyryldy, 300 km aryq jańardy.