Aqtóbe oblysynyń ákimi Ońdasyn Orazalın Hromtaý aýdanynyń Kóktaý aýylynda eki birdeı eńbek ujymdarymen kezdesti. Olar «Rýsskaıa mednaıa kompanııa» JAQ holdınginiń quramyna kiretin «Aqtóbe mys kompanııasy» JShS jáne «Kopper Tehnolodjı» JShS. Kezdesý óńirge arnaıy kelgen RMK Prezıdenti Vsevolod Levınniń sondaı-aq, oblystyq kásipodaq ókilderiniń qatysýymen ótti.
О́ndiristik qyzmettiń nátıjeleri jáne ujymdyq kelisimniń 2018 jyly qalaı iske asyrylǵany týraly kásiporynnyń bas dırektory Natalıa Bondarenko esep berdi. Onyń aıtýynsha, esepti kezeńde «Aqtóbe mys kompanııasy» JShS negizgi kapıtalǵa 10,6 mlrd teńgeden astam qarjy quısa, «Kopper Tehnolodjı» JShS ne 4,5 mlrd teńge saldy. Áleýmettik paket jumysy kúsheıtilip, jalaqy 4%-ke artqan. Qazirgi kezde eki kásiporynda 1500-ge jýyq adam qyzmet etýde.
Kásiporyn áleýmettik jaýapkershilik prınsıpin de saqtaıdy. Máselen, Aqtóbede 2018 jyly olardyń qatysýymen sal aýrýyna shaldyqqan, aýtızm, neıro-tirek-qımyl apparatynyń patologııasymen aýyratyn balalarǵa «Aıala» ońaltý ortalyǵy ashylǵan edi.
Aımaq basshysy 2019 jylǵa arnalǵan mindetter men tapsyrmalardy aıta kele, óndiris kólemin odan ári arttyrý, kásiporyndardy damytýǵa ınvestısııa tartý, eńbek resýrstarynyń sapasyn túbegeıli jaqsartý qajettigin atap ótti.
«Tutastaı alǵanda, kásiporyn basshylarynyń esepteri qanaǵattanarlyq, jumys berýshiler men eńbek ujymdary arasyndaǵy áleýmettik-seriktestik qarym-qatynastar turaqty, al basshylyq Elbasymyzdyń tapsyrmalaryn túsinýde. Árıne, ónimdilik kórsetkishinen bólek, jumysshylar aldyndaǵy barlyq áleýmettik mindettemeler tolyq kólemde oryndalýy tıis», - dedi Ońdasyn Orazalın.
Sonymen birge, oblys ákimi «Aqtóbe mys kompanııasy» JShS jáne «Kopper Tehnolodjı» JShS-niń bastaýysh kásipodaq uıymdaryn qurý qajettiligin erekshe atap ótip, bul máseleniń uıymdasqan túrde sheshilýin usyndy. Aımaq basshysy eńbek aqysyn kóterý jáne áleýmettik paketti keńeıtý arqyly qyzmetkerlerdiń materıaldyq ál-aýqatyn odan ári arttyrý qajettigin atap ótti.
О́z kezeginde, Vsevolod Levın kompanııa árýaqytta jergilikti atqarýshy organdarǵa,tapsyrmalardy oryndaý boıynsha birige jumys jasaıtynyna senim bildirdi.
Kezdesý, eńbek qatynastaryn retteý jáne qyzmetkerlerge áleýmettik kepildikter berýde óńirlik deńgeıde kelisilgen áreketter men ózara túsinistik týraly úshjaqty memorandýmǵa qol qoıýmen aıaqtaldy.
Jıynnan soń oblys ákimi «Aqtóbe mys kompanııasy» JShS-niń №1 baıytý zaýytyn jańǵyrtý barysymen tanysty.