380-i ǵana «kóktemgi naýqanǵa» ilikken. Esil, Qyzyljar, M. Jumabaev, Taıynsha aýdandary men Petropavl qalasynda jaǵdaı syn kótermeıdi. Eldi, jerdi qorǵaý qasıetti paryzym, abzal boryshym degen túsinikten aýlaq 761 bozbala izdestirilýde. Saıda sany, qumda izi joq, jer jutyp ketkendeı olardyń aldy Reseı asyp ketken. Ata-analar kóp rette balalarynyń turǵylyqty jerlerin, qaıda júrgenderin jasyryp, «qashpaq bolsań zymyranyń» kerin keltirip júr.
Jergilikti atqarýshy organdar óz mindetterine muqııat qaramaýy sebepti kemshilikter jylda kezdesedi, degen aımaq basshysy Qumar Aqsaqalov birlese qımyldaýdy, qaǵazbastylyqtan arylyp, naqty ispen aıalysýdy tapsyrdy. Desek te, Qorǵanys isteri jónindegi departament bastyǵy Almaz Tileýhanovtyń aıtar bazynasy az bolmaı shyqty. Qarýly Kúshter qatarynan basyn ala qashqandarǵa bes aılyq eseptik kórsetkish mólsherinde ǵana aıyppul salý qarastyrylǵan. Reseıde qylmystyq jaza qoldanylatyndyqtan, tártiptiń birshama kúsheıgeni baıqalady. Oblystyq medısınalyq komıssııa quramynda kóz dárigeri joq. Aýdandarda lor, dermatolog, psıhıatr, nevropatolog jetispeıdi. Áskerı tizimge alynǵandardyń 40 paıyzy – aýrýshań, dimkás. Olardyń birazyna salmaq jetispeýshiligi tán. Departament áskerge shaqyrýdy turǵyndardyń úıine áli kúnge deıin qaǵaz júzinde joldaıdy eken. Osy mezette mekenjaılaryn ózgertip jiberedi, bolmasa «shý, qaraquıryq!» dep tabandaryn jaltyratyp úlgeredi. Bul rette polısııa departamentiniń kómegi qajet ekeni ashyp aıtyldy.