Orman sharýashylyǵy qyzmetkerlerine zamanaýı úlgidegi órt sóndirý tehnıkalary berildi. Aqmola oblysyndaǵy orman sharýashylyǵy mekemeleri 13 birlik órtke qarsy tehnıkamen tolyqty. Mamyr aıynda taǵy berilmek.
Saltanatty is-shara Aqmola oblysy, Aqkól aýdanynyń ortalyǵynda ótti. Zaman talabyna saı jabdyqtalyp, qajetti qural-saımanmen tolyqqandy jaraqtalǵan órt sóndirý tehnıkalarynyń kiltin taratpas buryn birqatar ormanshy qurmetke bólendi. Ekologııa jáne tabıǵı resýrstar vıse-mınıstri Nurken Shárbıev pen Aqmola oblysy ákiminiń orynbasary Altynaı Ámirenova attan túspeı qyraǵylyq tanytyp, qorshaǵan ortanyń tynyshtyǵyn qaraýyldaıtyn orman sharýashylyǵy salasynyń ozat eńbekkerlerine qurmet gramotalaryn tabystady.
«2023 jyldan bastap Prezıdenttiń tapsyrmasymen Úkimet tarapynan órtke qarsy tehnıkany jańǵyrtýǵa baǵyttalǵan aýqymdy baǵdarlama qolǵa alyndy. Búgin de sondaı ıgi istiń kýási bolyp otyrmyz. 2024–2025 jyldary respýblıkalyq, jergilikti bıýdjet qarajaty esebinen 21,5 mlrd teńge bólinip, 92 órt sóndirý mashınasy, 118 shaǵyn orman patrýldik kesheni, 244 traktor, 240 patrýldik mashına, sonymen qatar 3 myńnan asa basqa da tehnıka satyp alyndy», dedi N.Shárbıev. Vıse-mınıstr lızıngtik qarajat esebinen 35 mlrd teńgege 1057 birlik órtke qarsy tehnıka satylyp alynatynyn, onyń ishinde 333 órt sóndirý mashınasy, 350 traktor men 374 orman patrýldik shaǵyn kesheni bolatynyn atap ótti.
«Memlekettiń qoldaýymen berilgen mundaı tehnıkalar orman órtiniń aldyn alyp, qaýip-qaterdi boldyrmaý maqsatynda berilip otyr. Qorshaǵan ortany kómkergen orman – elimizdiń baǵa jetpes baılyǵy, babalarymyzdyń urpaqtan-urpaqqa muraǵa qaldyrǵan ıgiligi men dáýleti. Halyq baılyǵyn kózdiń qarashyǵyndaı saqtap, aıalap ósirip, kútip-baptaıtyn ormanshylardyń eńbegi árqashan qurmetke laıyq», dedi A.Ámirenova.
«Buǵan deıin de bizdiń orman sharýashylyǵyna órt sóndirý tehnıkasy berilgen. Búgin taǵy da zaman talabyna saı tehnıkany tizgindegenimizge qýanyshtymyz. Jyldyń tórt mezgilinde de bosańdyq tanytpaı, qyraǵylyqpen ormannyń tynys-tirshiligin qadaǵalaıtyn áriptesterimiz búgin marapat alyp, qurmetke bólendi. Eń bastysy tilsiz jaý órt tutanbasyn dep tileımiz. Erterekte ormanshylardyń aılyq eńbekaqysy da mardymsyz edi, bir-eki jyldyń bederinde eselenip artty. Munyń ózi de – bizge erekshe demeý», deıdi orman sharýashylyǵynyń dırektory Erkin Haıdaruly.
Otandyq tehnıka óndirisiniń ónimi sanalatyn tehnıkany qurastyrýshylar orman órtin sóndirýshi mamandardyń da usynys, pikirlerin eskergen. Syıymdylyǵy 3 tonna sý arqalaǵan kólik órt oshaǵynyń ústine deıin jaqyndaı alady. Rezeńke dóńgelekterine de ózi sý búrkip, órtený qaýiptiligin tómendetedi. О́zin-ózi sóndirý qurylǵysy birden iske qosylyp, órt sóndirý barysynda qatar qyzmet atqarady.
Aqmola oblysynyń orman mekemelerine byltyr 30 traktor men 31 31 orman patrýldik shaǵyn kesheni berilgen. Bıyl úlestirilýge tıis 24 órt sóndirý kóliginiń qalǵan 11-i mamyr aıynda jetkiziledi.
Ekologııa jáne tabıǵı resýrstar mınıstrliginiń málimetinshe, 2011–2023 jyldar aralyǵynda orman jáne tabıǵatty qorǵaý mekemeleriniń materıaldyq-tehnıkalyq bazasy jańartylmaǵan. Búginde elimizdiń traktorlar men kishi orman órt sóndirý keshenderin jetkizý tolyq aıaqtaldy, sondaı-aq 152 órt sóndirý avtokóligi berildi. Bıylǵy mamyrdyń aıaǵyna deıin taǵy 168 órt sóndirý avtokóligi taratylmaqshy. Munyń barlyǵy da eldiń órt qaýpi joǵary óńirlerindegi memlekettik orman qorǵaýshylardy órtke qarsy tehnıkamen jańartyp, jabdyqtaýdy jaqsartý maqsatynda iske asyrylyp otyr.