Atyraý oblysynyń Jangeldın aýylynda bolǵan bir otbasynyń tórt múshesiniń qazasyna qatysty rezonansty qylmystyq is boıynsha sot otyrysy bastaldy. Sot otyrysynda kúdikti qandaı jaza túri bolsa da arqalaýǵa daıyn ekendigin jetkizdi, dep habarlaıdy Egemen.kz.
Tergeý derekterine sáıkes, aıyptalýshy Sultan Sársemálıev óz áıeliniń týystaryn – qaıyn atasyn, qaıyn enesin, sondaı-aq áıeliniń aǵasy men ápkesin óltirdi degen kúdikke ilingen. Ol sot otyrynda qylmys jasaýyna uzaq jyldar jalǵasqan otbasylyq janjal sebepker bolǵandyǵyn aıtty.
«Men sońyna deıin otbasymdy saqtap qalýǵa tyrystym. Áıelimmen on jyl birge turdyq. Eger aramyzda syılastyq pen baılanys múlde bolmaǵanda, osynsha ýaqyt birge ómir súrmes edik. Osy ýaqyt ishinde men otbasym úshin eńbek ettim, balalarymdy ósirýge, úıdiń jaǵdaıyn jasaýǵa barymdy saldym. Alaıda ýaqyt óte kele otbasymyzǵa syrttan aralasýlar kóbeıdi. Áıelimniń týystary balalar arqyly qoqan-loqy jasaı bastady», dedi kúdikti sot otyrysynda.
Sondaı-aq ol ata-enesin qasaqana óltirgenin de moıyndap, ólim jazasyna da kelisetindigin jetkizdi.
«Men balalarymdy anasynan da, ákesinen de, týǵan ájesinen de ajyratqym kelgen joq. Kerisinshe, olardyń tolyqqandy otbasynda óskenin qaladym. Biraq sońǵy ýaqytta barlyq kúsh-jigerim taýsylyp, psıhologııalyq turǵydan qatty sharshadym. Sondyqtan maǵan jasalǵan qylmystarǵa qasaqana qastandyqpen jaýap berdim. Osy jasaǵan áreketim úshin barlyq jaza túrine – ómir boıy bas bostandyǵynan aıyrýǵa da, ólim jazasyna da daıynmyn», dedi S.Sársemálıev.
Buǵan deıin kúdikti Sultan Sársemalıevtiń qylmysty bir ýaqytta emes, kezeń-kezeńimen jasaǵanyn jazǵan edik. Birinshi oqıǵa mamyr aıynda tirkelse, qalǵan úsh adam qarasha aıynda qaza tapqan. Qylmystyń aýyrlyǵyna baılanysty kúdikti ómir boıy bas bostandyǵynan aıyrylýy múmkin.
Atyraý oblysyndaǵy otbasynyń ólimi: Aqbaıanǵa qatysty qylmystyq qýdalaý toqtatyldy