Áleýmettik jelilerde jolaýshylar túsirgen vıdeo paıda bolǵan. Mańǵystaý-Semeı baǵytyndaǵy №37 poıyzdyń jolaýshylary vagondaǵy taraqandarǵa shaǵymdandy, dep habarlaıdy Egemen.kz.
Jurt dezınseksııa jumystarynyń sapasyzdyǵyna shaǵymdanyp jatyr. «Jolaýshylar tasymaly» kompanııasynyń málimdeýinshe, shaǵymnan keıin poıyz sońǵy stansııaǵa kelgen boıda quramǵa jospardan tys dezınseksııalyq óńdeý jumystary júrgiziledi.
«Bul vagondy josparly óńdeý jumystary belgilengen talaptarǵa sáıkes bıyl 30 mamyrda júrgizilgen. Normatıvter boıynsha jolaýshylar vagondaryn dezınseksııalaý aıyna keminde bir ret, al deratızasııalaý toqsanyna keminde bir ret júrgiziledi», dedi kompanııa ókilderi.
Lada. kz málimetinshe, tekserý qorytyndysy boıynsha poıyz bastyǵy, óndiristik oqytý nusqaýshysy, «Batys» fılıaly Mańǵystaý ýchaskesiniń bastyǵy, sondaı-aq, «Batys» fılıalynyń dırektory, dırektordyń servıstik qyzmet kórsetý jónindegi orynbasary jáne bas ınjeneri tártiptik jaýapkershilikke tartyldy.Sonymen qatar, vagondy reıske shyǵar aldynda qabyldaýǵa jáne daıyndaýǵa jaýapty bolǵan reısaldy komıssııasynyń barlyq múshesi jazalandy.
Kompanııa jolaýshylardan keltirilgen qolaısyzdyqtar úshin keshirim surady. Mán-jaıdy anyqtaý úshin «Batys» fılıalyna «Jolaýshylar tasymaly» AQ ortalyq apparatynan arnaıy komıssııa jiberildi.
Poıyz dárethanasynda bolǵan keleńsizdikten keıin jolaýshy 3 mln teńge óndirip aldy