«Astana qalasynyń Kólik jáne jol-kólik ınfraqurylymyn damytý basqarmasy» MM Turan dańǵylynan Qabanbaı batyr dańǵylyna deıingi ýchaskede Qorǵaljyn tas jolyna jóndeý jumystary júrgiziletini týraly málimdedi, dep habarlaıdy Egemen.kz.
Atalǵan jumystar merdiger uıymnyń qarajaty esebinen kepildik mindettemeler sheńberinde júrgiziledi. Osy oraıda búgin, 7 maýsym kúni atalǵan ýchaske ishinara jabylady. Bul rette avtokólik quraldarynyń qozǵalysy taraptardyń biri boıynsha eki baǵytta da júzege asyrylady.
«Elorda turǵyndary men qonaqtaryn qala joldaryndaǵy keptelisterdi boldyrmaý maqsatynda óz marshrýttaryn aldyn ala josparlaýdy suraımyz. Ýaqytsha qolaısyzdyqtar úshin keshirim suraımyz jáne jol jóndeý jumystaryn júrgizýge túsinistikpen qaraýdy suraımyz», delingen habarlamada.
Buǵan deıin, 7 maýsym kúni Astana Half Marathon jarysy ótýine baılanysty birqatar kóshede kólik qozǵalysyna ýaqytsha shekteý engiziletini týraly habarlaǵan edik.