2026 jyly el turǵyndary zeınetaqy jınaqtaryn turǵyn úı satyp alýǵa kóptep paıdalana bastaǵan. Úsh aı ishinde osy maqsatta BJZQ-dan shamamen 135 mlrd teńge sheship alynǵan, dep habarlaıdy Egemen.kz.
Turǵyn úı maqsatynda tek zeınetaqynyń «artyq» bóligi ǵana paıdalanylady. Bul – jetkiliktilik sheginen asatyn soma, ıaǵnı bolashaq zeınetaqy úshin mindetti túrde shotta qalýy tıis qarajattan artylǵan aqsha. Ár jas toby úshin jeke shek belgilengen.
Qazir elimizde jetkiliktilik shegin esepteý ádisin qaıta qarastyrýdy josparlap otyr. Eńbek mınıstrliginiń málimetinshe, shekter 2026 jyldyń mamyrynda qaıta qaralýy múmkin. Osy ózgeris kúshine ense, zeınetaqydan alynatyn qarajat kólemi azaıady. Sol sebepti azamattar qoldanystaǵy múmkindik aıasynda aqshalaryn erterek sheship alýǵa tyrysyp jatyr.
BJZQ derekterine sáıkes, 2026 jyldyń qańtar – naýryz aılarynda zeınetaqy jınaǵyn turǵyn úı maqsatynda paıdalaný boıynsha eń kóp qarajat kelesi baǵyttarǵa jumsalǵan:
turǵyn úı satyp alý jáne tolyq esep aıyrysý – 50,2 mlrd teńge; «Otbasy bank» depozıtin tolyqtyrý – 43,8 mlrd teńge; BVÝ ıpotekasyn ishinara óteý – 14,4 mlrd teńge; «Otbasy bank» ıpotekasyn ishinara óteý – 12,1 mlrd teńge; ıpoteka boıynsha bastapqy jarna – 3,9 mlrd teńge.Sáýir aıynda bul úrdis kúsheıgen. Turǵyn úı satyp alýǵa sheship alynǵan qarajat 66,8 mlrd teńgege jetip, naýryz aıymen salystyrǵanda 33%-ǵa artqan. Sonymen qatar «Otbasy bank» depozıtterin tolyqtyrý da kóbeıgen.
Aıta keteıik, buǵan deıin zeınetaqy shegin kóterý jobasy qoǵamdyq talqylaýda qoldaý tappaǵanyn jazǵan bolatynbyz.