Bishkekte Qamshybek Táshıevke qatysty aldyn ala sot tyńdaýlary bastaldy. Qyrǵyzstan Ulttyq qaýipsizdik memlekettik komıtetiniń tóraǵasy bılikti kúshpen basyp alýǵa daıyndaldy jáne qyzmettik ókilettigin asyra paıdalandy degen kúdikke ilingen, dep habarlaıdy Egemen.kz.
Is qupııa rejımge ótkendikten sot prosesine jýrnalıster men aıyptalýshynyń týystary kirgizilmegen.
Buǵan deıin advokat Ikramıdın Aıtqulov Qamshybek Táshıevke Qyrǵyz Respýblıkasy Qylmystyq kodeksiniń «Bılikti kúshpen basyp alý nemese ustap turý, sondaı-aq konstıtýsııalyq qurylysty kúshpen ózgertýge baǵyttalǵan áreketter» jáne «Qyzmettik ókilettigin asyra paıdalaný» baptary boıynsha aıyp taǵylǵanyn málimdegen.
Táshıevpen birge Qyrǵyzstannyń burynǵy bas prokýrory Qurmanqul Zulýshev pen eks-spıker Nurlanbek Turǵynbekuly da osy is boıynsha fıgýrant retinde atalyp otyr. Alaıda olardyń is boıynsha naqty mártebesi ázirge belgisiz.
Buǵan deıin atap ótkendeı, Qyrǵyzstan medıasy bul tergeýdi «75 adamnyń haty» degen oqıǵamen baılanystyryp otyr. Aqpanda 75 azamat prezıdent Sadyr Japarov pen parlament spıkeri Nurlanbek Turǵynbekulyna ashyq úndeý joldap, elde merziminen buryn prezıdent saılaýyn ótkizýdi talap etken.
Osydan keıin, 10 aqpanda Sadyr Japarov óziniń uzaq jyldar boıǵy seriktesi bolǵan Qamshybek Táshıevti qyzmetinen bosatty.