Qala ákiminiń orynbasarlary D.Jýmın men B.Mamytalıev kásiporynnyń jumysymen tanysýǵa arnaıy bardy. О́nimderi barlyq evropalyq standarttarǵa sáıkes keletin zaýyt basshylyǵy jergilikti qurylys kompanııalarynyń ókilderine óz ónimderin tanystyrdy.
Qala ákiminiń orynbasarlary zaýyt memlekettiń jalpy suranysynyń 40 paıyzdan astamyn qamtamasyz etip otyrǵanyn aıtyp, salynyp jatqan qurylysqa otandyq ónimdi qoldanýǵa shaqyrdy. Sonymen qatar qaladaǵy turǵyn úı qurylysynda otandyq qurylys materıaldaryn paıdalaný nazarda ekenin jetkizdi.
Aıta keteıik, «Zerde Keramıka» zaýyty jylyna 2 mln sharshy metr keramogranıt taqtaıshasyn shyǵarady. Qazaqstanda balamasy joq kásiporynda 140 adam jumyspen qamtylǵan. Qurylymdardy aralastyrýdan bastap daıyn ónimdi qaptaýǵa deıingi jeli tolyq avtomattandyrylǵan.