«Oblys ekonomıkasyn damytý úshin ónerkásipti damytýǵa jaǵdaı jasalýy tıis. Oblysta 9 ındýstrıaldy aımaqqa taldaý júrgizilip, olardyń nasharlaǵany nemese múldem jumys istemeıtini anyqtaldy. Osy 9 jumys istemeıtin aımaqtyń ornyna mashına qurastyrý, azyq-túlik óndirisi men jeńil ónerkásip, qurylys ındýstrııasy sekildi baǵytta belsendi serpin beretin 3 ındýstrıaldy aımaqqa kúsh salamyz. Negizgi qarjy osy jobalarǵa salynady», dedi О́.Shókeev.
Atap aıtqanda olar Kentaý, Túrkistan qalasy men Ordabasy aýdanynda bolady. Máselen Kentaýdaǵy 25 gektardaǵy aımaqtyń kólemi 300 gektarǵa ulǵaıtylady. Endigi kezekte ındýstrıaldy aımaqty arzan energetıkalyq qormen qamtamasyz etý kerek. Bul úshin Kentaý qalasyndaǵy Jylý elektr ortalyǵy qaıta qurylyp, gazben qamtý ınfraqurylymy júrgizý josparlanýda. Sonymen qatar, oblys ákimi óńir ekonomıkasynyń basty draıveri – aýyl sharýashylyǵy salasyna qatysty toqtaldy. Aýyl turǵyndaryn jumyspen qamtamasyz etip, salaǵa erekshe nazar aýdarý qajettigin aıtty.
«Búginde oblysta aýyl sharýashylyǵyna arnalǵan 6,7 mln. gektar jer bar, onyń ishinde 5,6 mln gektar jaıylymdyq jer, 518 myń jer telimi jáne 425 myń gektar sýarmaly jer bar. Salanyń qarqyndy damýyn qamtamasyz etý úshin qosymsha 250 myń gektar jerdi sýarmaly jer qataryna qosý qajet. Sebebi, sýarmaly jerden túsetin kirister 3-4 ese joǵary bolady. Atalǵan jerdi aınalymǵa engizý arqyly qosymsha oblystyń 20 myń turǵynyn jumyspen qamtýǵa bolady», dedi aımaq basshysy.
Sondaı-aq oblys ákimi azyq-túlik qaýipsizdigin qamtamasyz etý maqsatynda Túrkistan qalasyna sý arnalaryn júrgizip, qajetti azyq-túlik ónimin óndirýdi damytý arqyly shahardyń aınalasynan «azyq-túlik beldeýin» qurý kerektigin aıtty.