Qytaıdyń astanasy – Beıjiń qalasynda shaıbaly hokkeıden birinshi dıvızıondaǵy «V» tobyndaǵy komandalar arasynda ótip jatqan álem chempıonatynda Qazaqstannyń áıelder quramasy taǵy da utyldy.
Úshinshi kezdesýde jerlesterimiz Latvııaǵa qarsy oınady. Kezdesýdiń 3-mınýtynda Leva Peterson esep ashsa, 11-mınýtta Málıka Aldabergenova tarazy basyn teńestirdi. Bul esep uzaqqa deıin saqtaldy. Ekinshi jáne úshinshi kezeńderde kórermender birde-bir soǵylǵan goldy kóre alǵan joq. Al qosymsha ýaqytta Baltyq jaǵalaýynan kelgen qyzdardyń baǵy jandy. 66-mınýtta Anna Kýblına nysanany dál kózdep, óz komandasyna jeńis syılady.
Osylaısha, jerlesterimiz qatarynan úshinshi básekede jeńilistiń kermek dámin tatty. Buǵan deıin bizdiń qyzdar Polsha (3:5) jáne Gollandııa (1:3) quramalaryna ese jibergen edi.