Budan buryn habarlaǵanymyzdaı, Batys Qazaqstan oblysynda 1-30 sáýir aralyǵynda «Kıik» jedel aldyn alý is-sharasy ótip jatyr. Osy shara aıasynda Qaztalov aýdany Polısııa bóliminiń ýchaskelik polısııa ınspektory jáne «Ohotzooprom» RMQK ınspektory bar jedel top túngi tekserýge shyqqan bolatyn. Qaztalov aýdany Birlik aýyldyq okrýgi aýmaǵynan toqtatylǵan avtokólikte osy aýdan turǵyny men «Ohotzooprom» RMQK ınspektory bolǵan.
«Osy oqıǵa boıynsha QR Qylmystyq Kodeksiniń 337-baby (Zańsyz ańshylyq) jáne QK-nyń 339-baby (О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) boıynsha is qozǵalyp, sotqa deıingi tergep-tekserý bastaldy» dep habarlaıdy Batys Qazaqstan oblystyq Polısııa departamentiniń baspasóz qyzmeti.
Aıta keteıik, Qaztalov aýdany sotynyń sheshimimen burynǵy «Ohotzooprom» О́B» RMQK qyzmetkeri Nurǵazy Sadyqov «qyzmet babyn paıdalanyp, uıymdasqan qylmystyq top qurǵan jáne oǵan basshylyq jasaǵany úshin» uzaq jylǵa sottalǵan bolatyn.