Qańtar-naýryz aılarynda IJО́ ósýi 3,8%-ǵa deıin nyǵaıǵan. Esterińizge salar bolsaq, qańtar-aqpanda ol 3,5%-di quraǵan edi. О́sýdiń údeýi óńdeý ónerkásibiniń ósýinen, sondaı-aq qurylys jáne ınvestısııalardaǵy ósýdiń údeýi nátıjesinde boldy. Inflıasııa deńgeıi jospar boıynsha júrip jatyr. Jyl basynan beri 1,3%, al jyldyq mánde 4,8%-di quraǵan.
«Investısııalardyń serpini shamamen eki eselendi. Eki aıdyń qarqyny 4,2% boldy, al endi toqsan qorytyndysy boıynsha 7,0% deıin ósip otyr. О́sý negizinen ınvestısııalyq taýarlardy satyp alýmen baılanysty» dedi R.Dálenov.
Mınıstrlik aqparatyna súıensek, bıylǵy 1 sáýirdegi jaǵdaı boıynsha halyqaralyq rezervter 86 mlrd AQSh dollaryn quraǵan. Bıylǵy qańtar-naýryzda ónerkásip óndirisi 3,2%-ǵa ósti. Qańtar-aqpanda ósý 2,7% boldy. Sonymen qatar ken óndirý ónerkásibinde serpin báseńdedi. Eki aıdaǵy 6,3% qaraǵanda sońǵy aıdaǵy ósý 4,8%-dy qurady.
О́ńdeý ónerkásibiniń kóptegen salasynda eki tańbaly ósý baıqaldy. Bul – jeńil ónerkásip, sýsyn jáne plastmassa óndirý, qurylys materıaldaryn shyǵarý, sondaı-aq mashına, onyń ishinde avtokólik jasaý.