Qazaq rýhanııatynyń qabyrǵaly qaıratkeri

Qazaq rýhanııatynyń qabyrǵaly qaıratkeri

Seısenbi, 24 shilde 2012 7:39

 

Búgingi qazaq eliniń mádenıeti men óneriniń ósip-órkendeýine eren eńbek sińirip, ómirin arnaǵan azamattardyń ishindegi biregeıi Ilııas Omarov ekendigi jalpy jurt moıyndaǵan shyndyq. Ol qaı salada, qandaı qyzmet istemesin, báribir óziniń ómirlik maqsatynan aınyǵan joq. Bar bilik-bilimin, qajyr-qaıratyn ult rýhanııatynyń órkenıetti elderdiń qataryna qosylyp, eńse tikteýine jumsady. Bul pikirimizdiń aqıqattyǵyna Ilekeńniń ǵıbratty ǵumyry men áleýmettik qyzmeti kýá. Ol joǵary dárejeli qyzmetke erte qol jetkizdi.

Seısenbi, 24 shilde 2012 7:39

Búgingi qazaq eliniń mádenıeti men óneriniń ósip-órkendeýine eren eńbek sińirip, ómirin arnaǵan azamattardyń ishindegi biregeıi Ilııas Omarov ekendigi jalpy jurt moıyndaǵan shyndyq. Ol qaı salada, qandaı qyzmet istemesin, báribir óziniń ómirlik maqsatynan aınyǵan joq. Bar bilik-bilimin, qajyr-qaıratyn ult rýhanııatynyń órkenıetti elderdiń qataryna qosylyp, eńse tikteýine jumsady. Bul pikirimizdiń aqıqattyǵyna Ilekeńniń ǵıbratty ǵumyry men áleýmettik qyzmeti kýá. Ol joǵary dárejeli qyzmetke erte qol jetkizdi. Nebári 28 jasta mınıstr bolǵan. Sondaı-aq óziniń qysqa ǵumyrynda eki márte mınıstr, obkomnyń hatshysy, birinshi hatshysy, Respýblıkalyq Kompartııanyń hatshysy qyzmetterin abyroımen atqarǵan. Ara-arasynda dárejesi tómen jumystarǵa jegilgen kezderi de bar. Al onyń sebebi, júktelgen mindetin aqsatyp alǵandyqtan emes, keńestik kezeńniń solaqaı saıasatynyń saldary.

Baı kópestiń qyzyna úılengeni, qa­zaq ta­rıhy­nyń shyndyǵyn ashyp jazýǵa atsalys­qa­ny, qaı salada qyzmet atqar­ǵa­nyna qaramastan, qazaq óneri men mádenıetine qatysty mándi máselelerge qyzý aralasyp, kerek jerinde qolushyn berip, baspasóz betterinde parasatty oı-pikirlerin jarııalap turǵany bılik basyn­daǵylardyń keıbireýlerine una­map­ty. Alaıda ult qamyn jegen azamat ózi tańdaǵan joldan jalt burylmaǵan. Mansapqa emes maqsatqa qyz­met isteý­diń ónegesin kórsetken. Nátıjesinde halqynyń qalaýly azamaty sanatynda esimi eliniń esinde máńgi saqtalar tul­ǵa­lar tizimine qosyldy. Ol mádenıet mı­nıstri kezinde kabı­netiniń tórine qazaq­tyń aıaýly uly, ult máde­nıetine ólsheý­siz eńbek sińirgen T.Júrgenovtiń por­tre­tin ilip qoısa, sol Ilııastyń izgilikti qyzmetin jalǵastyrǵan. О́.Jánibekov te ózin onyń izbasar shákirti sanaǵan. Týǵan halqyna qaltqysyz qyzmet kór­se­tip, onyń eńseli eldiginiń basty kór­set­kishi sanalatyn óneri men mádenıetiniń joqshysy, qamqorshysy bolýdyń tamasha úlgisi osylaısha jalǵasyp, keıingi urpaqqa ulaǵatty ónegesin qaldyrýy qandaı ǵanıbet deseńizshi?!Bıyl – sol tulǵaly azamat Ilııas Omarovtyń jasy júzge tolatyn jyl. Soǵan oraı buryn-sońdy jaryq kórgen kitaptarynan iriktep, tańdap alyp oqyr­mandar nazaryna usynylyp otyr­ǵan jańa jınaqta (qurastyrýshy avtor) Ilııas Omarovtyń qazaq óneri men má­denıetiniń ózekti máselelerin qozǵap, onyń búgingi jaǵdaıyn taldap, bola­sha­ǵyna baǵdar bolarlyq tolǵaqty tolǵam­da­ryn ortaǵa salǵan kókeıkesti maqa­la­lar jáne osy maqsatyna jetý jolyn­daǵy eren eńbeginiń jarqyn betterin baıandaıtyn estelikter toptastyrylǵan. Jańa kitaptyń Ilekeńniń bekzat bolmysyn tanytýǵa tatıtyn eleýli eńbek ekendigi kúmánsiz. Endi biz osy kitapqa qysqasha bolsa da taldaý jasap, oqyr­manmen oı bólise ketpekshimiz. Al bul Ilekeń­niń qaıratkerlik qyzmetiniń qyr-syrynyń kiltin ashý degen sóz.

Ilııas Omarov – mádenıet pen áde­bıettiń barlyq salasyna aralasyp, kemel oı, kesek pikirlerin bólisken sanatker. Osy pikirimizdi dáıekti dálel­der­men tujyrymdaý maqsatymen birer maqalasyna toqtalalyq. Onyń birinshisi – «О́sken eldiń óreli mádenıeti». Ma­qala Orta Azııa men Qazaqstandy aralap qaıtqan fransýz jornalshysy Rober Lakontrdiń «Fıgaro» gaze­tinde ja­rııalanǵan joljazbalarynda aıtylǵan teris pikirlerge toıtarys berýge arnal­ǵan. Áıtse de, ol jaı ǵana sebep, al shyntýaıtynda, Ilekeńniń bul eńbeginde órkeni ósken qazaq eliniń óskeleń óneri men óreli mádenıetiniń syr-sıpaty keńinen qamtylyp jazylǵan. Onda týmysynan saýyqshyl, ónerpaz qazaq eliniń ánderi men kúıleri, ulttyq mýzy­ka­synyń baı qory jáne onyń jı­naqtalýy, nátıjesinde ónerdiń jańa salasy – ulttyq opera men balet janry­nyń dúnıege kelýi, Qurmanǵazy atyn­daǵy ult aspaptar orkestri, memlekettik án-bı ansambli, qazaq memlekettik akademııalyq drama teatry, Abaı atyn­daǵy akademııalyq opera jáne balet teatrynyń shańyraq kóterýi, beıneleý óneri men mádenı-aǵartý mekemeleriniń órken jaıýynyń jaı-jaǵdaıy taldana tarazylanyp, osy oraıdaǵy jemisti jetistikter men keleńsiz kemshilikter saralanǵan. Sondaı-aq, maqalada osynaý óner salalarynyń sańlaq tul­ǵa­lary týraly da tolymdy áńgimelengen.Al Ilekeń «О́ner muraty bıik bolmaq» jáne «Men jazbaımyn óleńdi ermek úshin» degen maqalalarynda kóp­tegen kókeıkesti másele­ler­di áńgimesine arqaý etip alyp, sony júzege asy­rý­dyń amal-tásilderin kórsetip, tyń oılar, tushymdy tujyrymdar jasaıdy. Ult­tyq óner­diń órkendeýine ádebıettiń zor yqpaly barly­ǵyn aıta otyryp, avtor sahna sáni drama­týr­gııalyq shyǵarma – pesa ekendigin jáne qazirgi qalamger­lerimizdiń osy janrdy meńgerýdegi she­berligi men shalalyǵy týraly tolǵa­nys­taryn júıeleı taldap, ózekti oılarymen bóli­sedi. Ilekeńniń M.Áýezov pen Ǵ.Músirepovtiń tamasha týyndylary­nyń qatary tolyspaı otyrǵandyǵyn ashy­nyp aıtqan pikiriniń túıini áli kún­ge tolyq sheshimin tap­paǵany da shyndyq.Ilekeńniń dramatýrgııada «eski men jańanyń arasyndaǵy kúresti tym qarabaıyr túsiný, ony kóbine-kóp adamdar arasyndaǵy syrt tartys­tardan, óndiristik, otbasylyq kelispestik­terden izdeý oryn alyp keledi. Kórermender sahnadan drama kórýdiń ornynan ásheıin daý-damaı, urys-janjal kórip… júr» degen sóziniń jany bar. Sahnada kóp rette shyn mánindegi rýhanı tartys, sezim arpalysy, jan kúızelisi, ómirdiń qyrlary, bolmystyń tereń syrlary boı kórsete bermeıtini beker emes qoı. Sahna­lyq shyǵarmalarda kóterilgen kópshilik máse­lelerdiń ózge elder pesalarynda aıtylyp qo­ıylǵandyǵy, ıá bolmasa onyń ómirde áldeqashan she­shi­min tapqandyǵy týraly eskertpesi de este bolatyn pikir. Al taqyryp sony­ly­ǵynyń tapshylyǵy – qazaq dramatýr­gııa­synyń óz únimen, óz betimen tanyta almaýynyń sebebi ekeni de sózsiz shyn­dyq. Teatrdaǵy sahnalyq qoıylymdy kórip otyryp kórermen tereń oıǵa batyp, tebirenbese, onda onyń naǵyz óner týyndysy bolmaǵany degen baılamnyń da jóni bar. Ilekeń qazirgi qazaq ómi­rin­degi kúrdeli qubylystar, qoǵamdyq or­ta­daǵy shıelenisti, sheshimin tosqan tolǵaqty máseleler shash etekten bola tura dramatýrgııamyz sol taqyrypty, sol shyndyqty ıgere almaı otyr­ǵan­dyǵyn da der kezinde kórsetip bergen bolatyn.

Bir ǵajaby, Ilııas Omarov, sol bir qazaq teatrynyń dáýrendep turǵan kezinde, ıaǵnı ataqtary jer jarǵan uly akterlerimiz Qalıbek, Serke, Qanybek, Sháken, Sábıra, Hadısha, Qa­pan, Elýbaı, Qurmanbek sahna tórinde júrgen shaqta da teatr tiliniń tazalyǵyn saqtaý máni zor másele ekendigin qatań esker­te­di. Ol akter­lerdiń ana tilimizdiń áýen-áýezin, názik árin qashyryp, saldyr-sa­laq sóıleıtinin, sóıtip onyń mazmundy­ly­ǵyn, mándiligin buzatyndy­ǵyn, al dramatýrgterimizdiń qazaq sóziniń san syryn, alýan boıaýly kórkemdigine kóńil bólmeı, birjolata qalalyqtardyń qara­baıyr, aýyzeki áńgimesine kóship ket­kendigine qyn­jy­lys bildirýi beker me?! Bul ózi qazirgi tańdaǵy naǵyz kókeıkesti másele ǵoı. Sodan kóre­gen­dikpen kúnil­geri saqtandyrǵan Ilekeńe qalaı rıza bolmassyń.Sońǵy jyldary «Mádenı mura» baǵdarla­masynyń arqasynda qazaqtyń ánderi men kúıleriniń tolyqqandy antologııasy jazylyp, jaryqqa shyǵyp, ultymyzdyń rýhanı qazyna­synyń altyn qoryna aınalýda. Al Ilekeń ózi mádenıet mınıstri qyzmetine kelmeı tu­ryp-aq, halyqtyń mýzykalyq mura­sy­nyń izdeýsiz, zert­teý­siz qalǵandyǵyn aıtyp, sol jóninde áldene­she qaıyra másele kótergen. Ilekeń aıtpaqshy, bizdiń baıaǵy A.Zataevıch jınaǵan án-kúılerge ǵana ıek artyp, osy maqsat­taǵy izdenisterdi tereńdete túsýge enjarlyq jasap júrgenimiz de ras qoı. Osylaısha Ilekeń qazaqtyń án men kúı óneriniń tereń tamyry halyqtyń folklory ekendigin dáleldep, rýhanı mu­ramyzdy baıyta túsýdiń asa qajettigin esimizge salǵan-tyn. Bul bolsa, halyq­tyq ónerdi túr, mazmun jaǵynan jańar­ta, jaqsarta, órkendete berý maqsatyn kózdegen, armandaǵan parasatty adam­nyń pikiri.Osy oraıda Ilekeń ataqty ánshiler men kúıshilerdiń attaryn atap, olardyń oryndaý­shylyq sheberlikteriniń syr-sıpatyna toqtala ketýdi de umytpaǵan. Jurtshylyq júregine jol tapqan talantty ónerpazdardyń dara qasıetteri men qabiletterin aıta otyryp, búgingi jastardyń vokaldy ónerdiń tehnıkasyn meńgere tura, halyq ánderi men kúı­le­rin oryndaýda orasholaqtyq kórsetip júrgenderin ashyp, ashyna áńgimeleı­tini bar. Sazyn da, sózin de, onyń ult­tyq áshekeı-mazmunyn da tereńnen, jan-júregimen uqpaıtynyn aıtsa, ony qalaı teriske shyǵarasyń. Ilekeń án men kúıdiń qulaq quryshyn qandyryp, jú­rekke jetýi úshin ánshi, aqyn, kompozı­tor­dyń shyǵarmashylyq bir­les­tigi men úndestigi úılesim tabýy qajettigin de dóp basyp aıtqan. Ánshilik, kúıshilik sheberlik shyńdaýdyń qaınar kózi osy aıtylǵan pikir­lerde ekendigi aına-qatesiz aqıqat.Dástúrli mýzyka týraly tolǵa­nys­ta­ryna qosa, Ilekeń búgingi estradalyq án­der jaıynda da oı bólisken. Ol ke­ńes­tik bılik tusynda estradalyq-djaz­dyq shyǵarmalarǵa kúdikpen qaraý­shy­lyq bolǵanyn, biraqta birte-birte onyń tyńdaýshylary kóbeıip bara jatqanyn, ásirese jastarymyzǵa jaǵymdy eken­digin, endeshe jańa óner salasyna kóńil bólip, jas janrdyń jaqsy baǵytta damýyna qamqorlyq jasaý qajet dese, oǵan qalaı qulaq aspaımyz?! Másele, búgingi jastardyń bıik estetıkalyq talǵamyn qalyp­tastyratyn, tárbıe­leıtin mýzyka jazatyn jas sazgerlerge dańǵyl jol ashýda.Jalpy, Ilııas Omarov zerdeli óner zert­teý­shisi ári ulttyq mádenıetimizdiń ustazy bolǵan ózgeshe daryndy óner­taný­shy. Onyń barsha shyǵarmashylyq eńbegi qazaq halqynyń álemdik kórkem­ónerde ózindik ornyn alýyna arnalǵan. Ilekeń álemdik teatr sahnasyna shyqqan kúrdeli óner týyndylary: opera, balet, drama ónerleri tóńiregindegi oı-tujy­rym­daryn ortaǵa salyp, onyń orny­ǵyp, órken jaıýyna, rýhymyzdy kóte­rýi­ne qatysty máselelerge erekshe kó­ńil bólip, jetistik-kemistigin saralaýdan da qalys qalǵan joq. Ol sonymen qatar bı, aıtys, til ónerlerine qatysty ma­ńyzdy máseleler kóterip qana qoımaı, olardyń ómirde óz deńgeıinde zaman, ultymyzdyń rýhanı baılyǵyna súbeli úles qosýyna qamqorshy da boldy. Basqasyn bylaı qoıǵanda, kenje qalsa da, bı óneriniń de qazaqqa jattyǵy joqtyǵyn aıtyp, qazir onyń ulttyq dástúrde órkendep kele jatqandyǵyna jan-jaqty toqtalyp, qundy oılaryna ortaq­tas­ty­ryp otyr. Osy arqyly biz Ilekeńniń álem­dik órkenıettiń ozyq shyǵarmalaryn jetik meń­gergen máde­nıet­tanýshy, qazaq rýhanııatynyń sha­ńy­raǵy shańqan, keregesi keń bolýyna atsa­lys­qan qajyrly kúresker bolǵan­dyǵyna rııasyz senemiz jáne eline sińirgen sol eńbegi úshin ardaqtaımyz.Ult mádenıetine baılanysty máse­le­ni sheshýge kelgende, basyn báıgege tigip, sózimen de, isimen de tikeleı ara­las­qan azamattyń myna eńbeginde sol oraıdaǵy qyzmeti birshama qam­tyl­ǵan. Tipti joljazba esebinde jarııalanǵan eki essesinde de erekshe kóńil aýdarar­lyq tustary bar. Aıtalyq, «Monreal saparynda» kórgenderi men kóńilge túıgenderin baıandaı otyryp, kórmede qazaqtyń qolóner sheberleri jasaǵan túrli zattardyń joǵary baǵalanǵanyn aıta kelip, ózimizdiń tarapymyzdan osy­ǵan tıisti mán bermeı júrgenimizge ókinishin bildiredi. Sol qolóner buıym­daryn sáýlet ónerine, qurylysqa paıdalaný jáne sývenır retinde arnaıy dú­ken­derde satý qajettigin aıtady. Qol­ónerden múlde qol úzip qalmaıyn desek, mektepterde tıisti úıirmeler ashyp, shákirtterdi sheberlikke baýlý jó­ninde usynys jasaýy da óte oryndy. Al «Aıas­tannyń altyn aıdary» bolsa, Armenııa men Qazaqstanda alma-kezek ótken áde­bıet pen óner salasynyń onkúndikteri­nen týǵan, túıgen oılaryn sabaqtaýǵa arnalypty.Ilekeń uly kompozıtor Komıtastyń armıan­nyń ulttyq mýzykasyn damytýǵa sińirgen erekshe eńbegin egjeı-tegjeı baıandaı otyryp, onyń halyq ánderin óńdep, búgingi kúnniń ozyq áýenderine qosqandyǵyna toqtalyp, soǵan oraı óz elimizdegi baı mýzykalyq muralary­myz­dyń jaı-kúıi kóńildegideı emesti­gin, bizdiń sazger­ler­diń oǵan atústi qa­rap, olar óńdegen án-kúılerdiń áýelgi syrly sazynan, áserli áýezdi­liginen jur­daı keıipke túsetindigine keıis bil­di­redi. Halyqtyq áýende ulttyq erek­she­likter eskerilýge tıistigin eske salady.Bizdiń japan túzde jańa ornaǵan elordamyz Astana qalasyna qatysty bir pikiri bar. Ol Erevan qalasynyń bet-beınesin aıshyqtap turǵan arhı­tek­týra­synyń ózgeshelikteri týraly tol­ǵam­dary. Sondaı-aq armıannyń «kún sý­retshisi» atanǵan Sarıannyń kartınalaryn taldaýy da tań-tamasha qaldyrady. Bul rette Ilekeńdi bilgir de biregeı ónertanýshy eken dep qabyldaısyń. Onyń armıannyń ár ataqty kompozıtorlary men ánshileriniń aty-jónderin ǵana emes, olardyń ónerge sińirgen eń­bek­terin taldaı túsindirýi de sózsiz súı­sin­diredi. Ilekeńniń ónegeli eldiń úlgi­si­ne qýanýmen birge odan úırenýge de um­tylý kerek degen qorytyndy pikirine qosyla ketesiń.Bizdiń paıymdaýymyzsha, Ilııas Oma­rovtyń ulttyq óner men mádenıetke qatysty jazbalaryn shyndap kelgende ǵylymı traktattar dep baǵalaýymyz kerek. О́ıtkeni onda syndarly oı, parasatty pikir, sony izdenis, tyń tujy­rym­dar toǵysyp jatyr. Onyń osy baǵyt, osy maqsattaǵy eren eńbekterin tolyq­tyra túsetin taǵy bir qyry bar. Ol qazaqtyń kórnekti akter, ǵalym jáne jazýshylary týraly ádebı-kórkem syn maqalalary. Ár sala, ár janrdaǵy sý­ret­kerlerdiń daryn-qabiletiniń tabıǵa­tyn ashyp, shyǵarmashylyq eńbekteri­niń erekshelikterin tarazylaı taldaý barysynda da Ilekeńniń bilimpazdyǵy, óresi, talǵamy, ult ónerine degen súıis­penshiligi aıryqsha, aıqyn ańǵarylyp tur. Ásirese, onyń Beıimbet, Muhtar, Ǵabıt, Baýyrjan, Syrbaı shyǵar­ma­shy­lyqtaryn taldaǵan zertteýleri – baısaldy, batyl, óreli, óristi syndarly kórkemónerdiń kókjıegin keńeıtip, ult­tyq rýhanı qazynamyzǵa olja salǵany belgili. Bul oraıda Ilekeńniń ustanǵan baǵdary – adal­dyqtyń ala jibin attamaý, jaqsyny jazǵyryp, ádeıi dattamaý, tulǵaly talantqa janashyr bolý.Sańlaq sanatker, qarymdy qoǵam qaıratkeri Ilekeńniń ozyq oıly orys jazýshy, akter, ǵa­lymdarymen jazys­qan hattary, A.Chehov, V.Belınskıı, N.Sas, Iý.Kazakov, L.Leonov, I.Týr­genovtyń shyǵarmashylyǵyn taldaǵan tolǵam­dary da onyń kórkem oıdyń kósh basynda turǵan tulǵa ekendigine naqty dálel. О́zi­niń ádebıet pen óner haqyn­daǵy pikir­lerin aıtýdyń osy ádisin ol qazaq aqyn-jazýshylaryna joldaǵan hat­tarynda da jalǵastyrdy. Jol-jóne­keı jazylsa da, qysqa da nusqa tálimdi oılarymen bólisken bul jazbalar da Ilekeńniń suńǵyla synshyldyǵy men ǵajap ǵulamalyǵyn aıǵaqtap turǵan dáıekter.Kitapqa engen estelikter de alash azamaty­nyń asqaq beınesine ornatyl­ǵan eskertkish sııaqty. О́ńkeı ıgi jaq­sylary men jaı­sańdary­nyń jazbalary Ilekeńniń adamı jáne azamattyq bolmysyn jan-jaqty, ár qyrynan kórsetýge arnalǵan. Kezinde aralasqan, syr­lasyp-muńdas­qan, dámdes bolǵan qazaqtyń mar­qasqalary: Ǵabıt Músirepov, О́mir­zaq Sul­tanǵazın, Serik Qırabaev, Ábdi­já­mil Nur­peıi­sov, Asqar Zakarın, Syrbaı Máýlenov, Ǵafý Qaıyrbekov, Juma­ǵalı Ysmaǵulov, О́zbekáli Jánibekov, t.b. ataqty adamdardyń Ilııas Omarov syndy segiz qyrly, bir syrly aıaýly azamattyń halqyna, eline, onyń óneri men mádenıetin órkendetýge sińirgen eren eńbegin, qarapaıym adam retindegi bolmys-bitimin bizderge – keıingi ur­paqqa jet­kizýdi kózdegen estelikteriniń taǵylymy mol.Týǵan eline, qazaq halqyna qadirli, aınalasyna abyroıly kemel tulǵalar kóp desek kúpir­lik bolar. Al Ilııas Omarov – mol sırekterdiń qataryndaǵy qaı­ratker. Zaman ózgerse de, qoǵam jańarsa da búgingi urpaqpen syrlas, pikirles, maqsattas bolyp qalǵan da qaıran Ilekeń. Onyń oı-armany, búgingi bizben úndes. Onyń boıyn­daǵy eń ardaqty, eń asyl qasıeti – qazaǵyna degen sheksiz súıispenshiligi. Ol – halqynyń adal uly retinde eliniń esinde máńgi saqta­latyn tulǵa. Ol – halqynyń rýhanı ómiriniń janashyry, qamqorshysy bol­ǵan azamat. Ilekeńe abyroı-bedel atqar­ǵan joǵary dárejeli shenimen emes, boıyna bitken tabıǵı daryny arqyly kelgen. Taıazdyq pen saıazdyqtan ada, Ilekeń syndy ult ustazynyń sanamyzǵa sińirip ketken sabaǵyn júregimizge uıalatsaq, umytpasaq qana halqynyń qa­myn oılaıtyn azamat qataryna qosy­laty­ny­myz jadymyzda júrsin deımiz. Tabıǵı talant­y­nyń jemisin týǵan hal­qynyń ónerin órge bas­ty­rýǵa arnaǵan azamat Ilekeńdeı-aq bolsyn! Ilııas Omarovtyń amanaty boıynsha bizdiń jatsaq-tur­saq oıymyzdan shyqpaýǵa tıis basty maqsatymyz bireý: ol ulty­myzdyń óneri men mádenıetin kókke órletip, órkendetýge aıanbaı atsalysý!Iá, Ilekeń elim dep emirenbese, qaza­ǵym dep tebirenbese kezindegi keńestik kezeńniń tar qyspaǵynda ǵumyr keshe júrip, adaldyqtan aınymaı, ultynyń kemel keleshegin oılap, sol maqsatqa oı-sanasyn sarqa jumsap, ózgelerdiń de el ıgiligine adal qyzmet isteýine jolashar bolar ma edi?! Onyń ómiri azamat­tyq asqaq maq­satqa, qajymas kúreske, úzilmes úmitke, rııasyz senimge toly. Tula boıy tunyp turǵan ult­jandy­lyqtan jaratylǵan tulǵanyń tolyqqan­dy shyǵarma­shylyq jáne qaıratkerlik beınesin aıshyqtaý úshin arnaıy kitap arnasa da artyq bolmas edi. Al búginde ony el tarıhynyń tórinen oryn alǵan tulǵa desek, onda ol Ilııas Omarovtyń halqyna sińirgen eńbeginiń izi saırap jatqan isine berilgen baǵa dep bilemiz. Ol – halqynyń aldyndaǵy perzenttik paryzyn adal ótegen azamat.Eliniń búgini men erteńin oılap, qazirgi sáttiń jaqsylyqtarymen jalǵa­syp, bolashaqta budan da kórkeıe túsýin ańsap-armandap, jaryq dúnıemen qosh­tasar sátinde de halqymnyń aldyndaǵy azamattyq boryshymdy oılaǵandaı oryndaı almaı baramyn dep opynǵan jaryqtyq Ilekeńniń bekzat beınesine qatysty azdy-kóp oılarymyzdy osymen aıaqtaı turamyz. Biz aıtpaǵandy, biz ashpaǵandy keıingi urpaq jerine jetkize jazar degenge kámil senimdimiz...

Qýanyshbaı QURMANǴALI,Qazaqstan Jazýshylar odaǵynyń múshesi.