Kókjaılaý shatqalyn qorǵaýǵa arnalǵan qoǵamdyq naýqan Almatyda segiz jyl boıy júzege asyrylyp keledi, qazir ol azamattyq ózindik sana sezimniń nyshanyna aınalyp úlgerdi. 2019 jyldyń 8 sáýirinde Almatyda Qoǵamdyq keńestiń keńeıtilgen májilisi ótip, onda qala ákimi B.Baıbek «Kókjaılaý» shıpajaıyn júzege asyrý týraly usynysty «qurylys máselelerin muqııat zerttteý qajet» degen syltaýmen 3-5 jylǵa shegere turýdy usyndy. Bul qadamdy kóptegen sarapshylar qoǵam úshin jasalǵan keńshilik retinde qabyldaǵan bolsa, biraq ekologııalyq belsendiler buǵan asa senbegendi jón kóredi.
«Jobany júzege asyrýdy birneshe jylǵa keıinge shegerý osyndaı mańyzdy máseleniń sheshimi emes dep esepteımiz. Mundaı qurylysqa qarsy kóterilip otyrǵandyǵymyzdyń basty sebebi – Kókjaılaý shatqaly Ile-Alataý ulttyq tabıǵat saıabaǵynyń quramyna kiredi jáne de qazir ulttyq saıabaq aýmaǵymen qorǵalǵan. Kókjaılaý shatqalyn erekshe qorǵalatyn tabıǵat aımaǵy sanatynan qordaǵy jerge aýdarý shatqaldaǵy jáne ulttyq saıabaqqa japsarlas jatqan aýmaqtaǵy ekologııalyq jaǵdaıdyń aıtarlyqtaı nasharlaýyna ákelip soqty» dep jazady belsendiler Qazaqstan Prezıdenti Qasym-Jomart Toqaevqa joldaǵan ashyq hatynda.
Ulttyq saıabaqtardyń jerin «týrızmdi damytamyz» degen syltaýmen jabaıylyqpen qoldaný búgingi kúni jappaı kórinis taýyp, qazaqstandyqtardyń ekologııalyq aman-saýlyǵyna qaýip tóndirip tur, dep esepteıdi belsendi ekologshylar. Alaıda bul tusta Ulttyq saıabaqtardyń aýmaǵyn sharýashylyq maqsatta qoldaný jaıly ǵana sóz bolyp turǵan joq. Tabıǵat ortasyn kórgensizdikpen buzý oqıǵalary búkil el aýmaǵynda oryn alyp, halyqtyń úlken alańdaýshylyǵyn týdyryp otyr. Oraldaǵy balyqtardyń qyrǵyny, Pavlodardaǵy ormandardy shaýyp tastaý, elimizdiń ońtústigi men shyǵysynda sýaıdyndarynyń ónerkásiptik qaldyqtarmen lastanýy, aýyl sharýashylyǵynda hımıkattardy baqylaýsyz paıdalaný, qoqyspen laılanǵan ózen jaǵalaýlary, iri qalalardaǵy aýanyń on esege artyq lastanýy – munyń bári qazirgi zamandaǵy Qazaqstannyń kóz aldynda turǵan shyndyq.
«Eldiń ekologııalyq aman-saýlyǵy búgingi kúni birinshi josparǵa shyǵyp otyr dep esepteıdi «Kókjaılaýdy aman saqtap qalaıyq» tobynyń ókilderi. Osy máselelerdi sheshýge prezıdenttikke úmitkerlerdiń kóńil bólmeýi durys bolmas. Biz saıasatkerlerdi ekologııalyq máselelerge jiti kóńil bólýge úndeımiz. Osy tusta tabıǵat máseleleri saılaý aldy naýqan kezinde ǵana emes, sonymen birge, is júzinde júıeli túrde sheshilýi tıis» dep esepteıdi Qazaqstan Qoǵamdyq uıymdar ekoforýmynyń tóraǵasy Vadım Nı.