Atamyz atqa minbegen be?..

Aýyldan inim kelgen. Jyl­qyshy. Jıyrma jyldan beri shoq juldyzdaı shaǵyn aýyldyń alty úıir jylqysyn baǵady. Kelgen sebebi, kásibine qajetti er toqym, qamshy, júgen-noqta izdep júr eken. Qara shańyraqta otyrǵan kenje balanyń qajetine jaraý paryz. Ekeýmiz bazar ara­ladyq. Munda ne joq deısiz, qustyń sútinen basqasynyń bári tabylatyn syńaıly. Bi­raq, biz izdegen at ábzelderi kózge sha­lynbady. Satýshy qaýym­nan da, jol-jónekeı kez­des­ken kóztanystardan da buıym­taıy­myzdy aıtyp, jón sura­ǵanbyz. Bári ýádelesip qoı­ǵan­daı, ıyqtaryn qıqań etkizip, alaqandaryn jaıǵannan aspady. 

Bar eken. Bir qýanyp, bir ókindik. Qýanǵanymyz, joq izdegen jolaýshynyń dilgir bol­ǵan zatyna kezikkeni, al, óki­nish qasqaldaqtyń qanyndaı tapshy bolyp ketken álgi zat­tyń ózgeniń sóresinde jatqan­dyǵynda. Kún qaqqan qońyrqaı óńdi, aıyr qalpaqty qyrǵyz aǵaıyn er toqymnyń neshe ata­­syn kórsetti. At arqasyna quıyp qoıǵandaı bolyp jatatyn jalpaǵy, sánge, saltanatqa mi­netin úırekbasty, jazylǵan alaqandaıy da bar eken. Qolǵa qondyrǵan qaýyrsyndaı jep-jeńil, báıgege qosqan júırik atqa salatyny da jatyr. Alataýdyń arǵy jaǵynda er shabýǵa laıyq­ty aǵash az ba, qurandy erdiń súıegin bir­neshe bólikten qııýlas­tyryp, jelimdep jasaǵan eken. Qaıyń­nyń bezi bolsa kerek, quıylǵan qorǵasyndaı birtutas bolyp jatyr. Osynysy jaqsy, qaıyń bezi óte berik, kún astynda kúı­genimen, qańsymaıdy. Er súıegin shabarda aǵashty tuzdy sýǵa sa­­lyp pisirý kerek. Sonda esh ýa­qytta jarylmaıdy. 

Qyrǵyz aǵaıynnyń kásibine qyzyqqanymyz-aı, qamshynyń da neshe túri bar. Qyzǵylt reńdi saryala qamshy. Úsh órim deısiz be, alty órim deısiz be, túr-tú­rimen. Kıizden syrylyp, aınala jıegin shuǵamen kómkergen to­qym da, qyz jasaýyna jaraıtyn ádemi, berik noqta da bar eken. 

Jylqyshy bala kimniń ja­saǵanynda jumysy qansha, kisi qunyn surasa da kidireıin dep turǵan joq. Qaltasynyń qaý­qary jetkenshe kenelip-aq qaldy. Bazardan shyǵa bere qoly epsekti qazaq kásipkerlerine ótimdi taýardyń qaısy ekendigin aıtqym kelgeni. Alataýdyń arǵy betinen kelgen aǵaıyn satyp turǵan tól buıymymyzdy shynymen ózimiz jasaı almaımyz ba, álde bizdiń atamyz atqa minbep pe edi?!