Dene tárbıesiniń tetigi – jańashyldyqta

Taıaýda «Baldáýren» respýblıkalyq oqý-saýyqtyrý ortalyǵynyń baza­syn­da Jastar jyly sheńberinde «Dene shynyqtyrý pániniń úzdik muǵa­li­mi-2019» IV respýblıkalyq baıqaýy ótti. Birden aıta keteıik, baıqaý­dyń negizgi maqsaty – dene tárbıe­si páni muǵalimderiniń kásibı bilik­tiligin jetildirý. Elimiz boıynsha pán muǵalimderiniń bilimi men biligi, kásibı sheberlikteri syn tezine túsken bul baıqaýdy Bilim jáne ǵylym mınıstrliginiń qoldaýymen Ulttyq dene tárbıesi ǵylymı-tájirıbelik ortalyǵy ótkizip otyr. Jastar jyly sheńberinde bolǵandyqtan, baıqaýǵa 30 jasqa deıingi talapkerler qatysty. Tek jasy ǵana emes, tájirıbesi de eske­ril­gen. Úmitkerlerdiń jalpy bilim beretin mektepterde óz páni boıynsha jumys istegen jeti jyldyq tájirıbesi bolýy shart. 

Respýblıkalyq synaqqa óz óńirleri úki­lep úmit artqan kil júırikter jı­nal­­dy. Olaı bolatyny, aldymen aýdan­dyq, oblystyq baıqaýlar uıym­das­tyrylyp, júzden júırik, myń­nan tulpar shyqqandar syn tezinen ótken. Býrabaıdyń baýraıynda kórigi qyzǵan baıqaýǵa Nur-Sultan, Almaty qalalarymen qatar, elimizdiń 13 oblysynyń jáne «Baldáýren», «Baldáýren-Shymkent» respýblıkalyq oqý-saýyq­ty­rý ortalyqtarynyń ókil­de­ri qatysty. 

Aldymen saltanatty ashylý rásimi ótti. Kásibı biliktilikterin sarapqa salǵaly turǵandardyń aldynda «Baldáý­ren» ortalyǵynyń bas dırektory Muhıtdın Tólepbaı jáne baıqaýdyń bas tóreshisi Ulttyq dene tárbıesi ǵylymı-tájirıbelik ortalyǵynyń dırektory Sadyq Mustafaev sóz sóılep, atalǵan baıqaýdyń mán-mańyzyna tereńirek toqtaldy. Uıymdastyrýshylardyń aıtýyna qaraǵanda, mundaı jıyn ótkizýdiń paıdasy mol. Birinshiden, elimizdiń ár túkpirinen kelip otyrǵan úmitkerlerdiń boıyndaǵy kásibı bilim-biliktiligi arqyly ár aımaqta dene tárbıesi pániniń qanshalyqty damyp jatqanyn saraptaýǵa bolady. Ekinshiden, ózara baq synasqan pán muǵalimderi áriptesteriniń ozyq ádis-tásilderin, tálimdi tájirıbelerin tereńirek tanyp, boılaryna sińiredi. Aınalyp kelgende, úzdikke ilesý arqyly ortaq is alǵa jyljıdy. 

Baıqaý barysynda biliktilikti saraptaý jáne jańashyl pedagog baǵyttary boıynsha talapkerlerdiń óresi tarazy basyna tartyldy. Alǵashqy synaqta pán muǵalimderi dene tárbıesi boıynsha 30 suraqtan turatyn saýalnamaǵa júz mınýttyń ishinde jaýap berse, 20 suraqtan turatyn pedagogıka jáne oqytý ádistemeleri oraıyndaǵy bilik­ti­likteri bezbendeldi. Sondaı-aq osy baǵytta ár muǵalim basketbol, voleıbol tá­rizdi sport túrlerinen naqty is-qımyl úlgi­lerin kórsetti. 

Baıqaýdyń ekinshi kezeńinde qatysý­shy­lar óz mamandyqtaryna oraı ozyq oılarymen, ilkimdi isterimen, nátıjeli jumystarymen erekshelendi. Pándi oqytý barysyndaǵy tıimdiligi mol jańalyqtarymen bólisti. 

Baıqaýdyń úshinshi, tórtinshi ke­zeń­­deri de tartys­ty ótti. Ashyq sabaq ótkizildi. Mekteptegi sport sharalaryn uıymdastyrýdyń úzdik úlgileri sarapshylardyń nazaryna usynyldy. Máselen, 5-9-synyptarda bul pán bilim berý salasyndaǵy jańartylǵan baǵ­dar­la­ma boıynsha ótkiziledi. Jarystyń bir ereksheligi – konkýrsqa qatysýshylar taqyryptardy ózderi tańdap aldy. 

Qazylar alqasynyń sheshimimen bas júlde Batys Qazaqstan oblysynyń ókili Abzal Naýryzbaevqa buıyrsa, birinshi orynǵa Jambyl oblysynan Dmıtrıı Voronko, ekinshi orynǵa Mańǵystaý oblysynyń ókili Kóben Nursultan ıe boldy. Al úshinshi orynǵa Aqtóbe oblysynan kelgen Samǵat Esqaraev jaıǵasty.  Aqmola oblysy, Býrabaı aýdany