Katar astanasy Dohada ótip jatqan jeńil atletıkadan Azııa chempıonatynda úsh qarǵyp sekirýden jeńimpazdar anyqtalady. Bul týraly Qazaqstan UOK baspasóz qyzmeti habarlady.
О́kinishke qaraı, Qazaqstan komandasynyń kóshbasshysy Olga Rypakova jarysqa qatyspaıdy. Olympic.kz saıtyna suhbat bergen Olımpıada chempıony qurlyq dodasynan ne úshin syrt qalǵanyn túsindirdi.
«Azııa chempıonatynan bas tartýǵa májbúrmiz. О́kinishti. Chempıonat qarsańynda Túrkııada ótken oqý-jattyǵý jıyndarynda azdaǵan jaraqat aldym. Dohaǵa kelgen soń dárigerler muny rastady. Árıne, aıtarlyqtaı qorqynyshty emes. Tipti, jarysqa qatysýǵa da bolar edi. Biraq jaraqatty odan ári ýshyqtyryp almaý úshin osyndaı sheshim qabyldadyq. О́ıtkeni, maýsym endi ǵana bastaldy, sol sebepti, aldaǵy álem chempıonatyna daıyndalý qajet», - deıdi Rypakova.