«Kórme» kórme ortalyǵynda «Eurasian Book Fair–2019» IV Evrazııalyq Halyqaralyq kitap kórme-jármeńkesiniń ashylý saltanaty ótýde.
«Elordamyzda tórt kún ótetin IV Eýrazııa halyqaralyq kitap kórme-jármeńkesine jınalǵan jurtshylyqty kórgenime qýanyshtymyn. Biz búgin Eýrazııa aýmaǵyndaǵy mańyzdy mádenenı sharanyń kýágeri atanyp otyrmyz. Kitap forýmyn ótkizý – elimizdegi ádebıet salasynyń ǵana jetistigi emes, ol barlyq kitapsúıer qaýymnyń merekesi» dep atap ótti saltanatty is-sharany ashqan QR Mádenıet jáne sport mınıstri Arystanbek Muhamedıuly.
«Eurasian Book Fair» – eýrazııalyq halyqaralyq kitap kórme-jármeńkesi elimizdegi – iskerlik jáne gýmanıtarlyq áriptestikti damytý jáne nyǵaıtý maqsatynda TMD, Eýropa jáne Azııa elderiniń baspa, kitap saýdasy uıymdaryn, mádenı jáne bilim berý ortalyqtaryn úlken ıntellektýaldyq alańǵa biriktiretin asa iri kitap forýmy.
Bul kórmege 13 memleketten kelgen 90 kompanııa qatysady. Onyń ishinde Reseı, Ázerbaıjan, Tájikstan, Armenııa, Qyrǵyzstan, Túrkııa, Qytaı, Iran, Polsha, Belgııa, Latvııa, Ýkraına, О́zbekstan bar.
Jastar jyly aıasynda jas avtorlardyń qatysýymen «Ashyq áńgime» aqyndyq marafon, kitaptyq áńgimelesý (book talks), ádebıet klýbynyń otyrysy, «Kitapty qalaı tıimdi oqý kerek?» taqyrybyna arnalǵan sheberlik synyptary, tanymal aqyn-jazýshylarmen avtograf-sessııa uıymdastyrylady. Olardyń ishinde balalar kitaby Búkilreseılik festıvaliniń dırektory jáne jazýshy Iýrıı Nechıporenko, «Kıt plyvıot na sever», «Sovınyı volk» kitaptarynyń avtory Anastasııa Strokına bar. Tanymal balalar jazýshysy Anna Goncharovamen ınteraktıvti jáne shyǵarmashylyq kezdesý bolady.
Bul sharanyń aıasynda tanymal mádenıet qaıratkerleri, jazýshylar jáne aqyndarmen kezdesýler uıymdastyrylady. Olardyń arasynda jas aqyn Mergen Toqsanbaı men Qazaqstan Respýblıkasynyń Jazýshylar Odaǵynyń tóraǵasy, aqyn Ulyqbek Esdaýlet, sondaı-aq tarıh ǵylymdarynyń doktory, professor, Eýrazııa Ulttyq ýnıversıtetiniń rektory Erlan Sydyqov ta bar.