«Professor nemese ǵalym emespin. Biraq jyldar boıy ustazdarym, basshylarymnan alǵan ómirlik sabaǵym, memlekettik qyzmette jınaǵan tájirıbelerimmen bóliskim keledi. Kóshbasshy bolatyn tulǵanyń boıynda tártip, ózin baqylaýda ustaý, eńbekqorlyq, batyldyq, optımıst, jańalyqtan qoryqpaý, senimdilik, qol astyndaǵy qyzmetkerlerine ashyq ta ádil bolatyn qasıeti bolýy qajet. Sonda ǵana tulǵa bolatyn azamattyń maqsaty aıqyn, jumysy alǵa jyljıdy. Asanbaı Asqarov sekildi kóregen basshylardyń eńbeginiń nátıjesinde qalamyzda zoobaq, dendrosaıabaq sekildi iri nysandar salynyp, aty tarıhta qalǵanyn eske alǵan ákim «Qalada qazir salynyp jatqan Shymkent Sıtı – kózsiz batyl sheshimniń nátıjesinde dúnıege kelgen joba. Al ony alǵash tanystyrǵanda keıbir azamattar túsinbegen edi. Úsh jylda Shymkent qalasy múlde ózgeredi. Stadıon, temirjol vokzaly, jańa shaǵynaýdandar, qarjy ortalyǵy salynyp, Qoshqar ata ózeni jańa keıipke enedi. Sol kezde Shymshahardan eshkim ketkisi kelmeıdi. Adal qyzmet ete otyryp, qalany damýyna birlese atsalysaıyq», dedi Ǵabıdolla Rahmatollauly.
Jańa formattaǵy dáriske qaıta daıarlaý kýrsynan ótip jatqan basshy laýazymǵa alǵash daıyndalǵan 45 memlekettik qyzmetshi, onyń ishinde, oblystyq 34, qalalyq 11 mekemeniń qyzmetshileri qatysty.
Kezdesýde tórt tildi jetik biletin shahar basshysy memlekettik basqarý isteri jónindegi agenttikte bas maman qyzmetinen bastaǵan eńbek jolynan úshinshi megapolısti basqarǵan satylaryna deıingi tájirıbesimen bólisti.
«Bilimdi bolý – úlken qarý. Sondyqtan memlekettik qyzmetshiler árdaıym ózin damytyp, jetildirip otyrǵanda ǵana jetistikti baǵyndyra alady. Sondaı-aq, memlekettik qyzmetkerler alǵan bilimi men jınaǵan tájirıbesin halyqqa adal qyzmet etýge jumsaýy qajet», dedi qala ákimi.
Qazirgi tańda Shymkenttegi 53 memlekettik organda 2078 memlekettik qyzmetker jumys isteıdi. Aıta keterligi, Elbasynyń tikeleı tapsyrmasymen elimizdegi memlekettik qyzmetshilerdiń aılyq jalaqysy ósti.