«Búgingi ustazdyń bedeli men abyroıyn qalaı kóterýge bolady jáne bolashaq muǵalim mamandary úshin eń basty qundylyq ne?» degen sııaqty ózekti máseleler áńgime arqaýy bolǵan jıyndy Qyzdar ýnıversıtetiniń Áleýmettik damý jónindegi prorektory Jańagúl Sultanova ashyp, Aıagúl Tóreqyzynyń urpaq tárbıeleýdegi eleýli úlesine keńinen toqtaldy.
– Siz ǵumyryńyzdyń mazmundy kezeńderi men ómirińizdiń jarqyn sátterin bilim berý salasyna arnap, biliktiligińiz ben uıymdastyrýshylyq qabiletińizdiń arqasynda el qurmetine bólendińiz. Qazaqta «Ustazdyq etý – ýaqyt utý emes. О́zgeniń ýaqytyn aıalaý, ózińniń ýaqytyńdy aıamaý» degen ulaǵatqa aınalǵan uǵym bar. Rasynda da pedagog – adam tárbıeshisi, kez kelgen jannyń taǵdyr talaıyna jazyla bermeıtin erekshe mamandyq. Ustaz joly – ǵıbratty jol. Ustazdyqtyń uly jolynda qajyrly qyzmet qylǵan adam ǵana bıik belesti baǵyndyra alady. Bul turǵyda eńbegi – eren, ómiri – ónege Aıagúl Tóreqyzy óskeleń urpaqty óresi joǵary azamat qylyp tárbıelep, izdenis pen talapqa negizdelgen mártebeli mamandyqtyń abyroıyn arttyrýǵa zor úles qosyp keledi, dedi Jańagúl Sultanova.
Sonymen qatar ol pedagogtyń otandyq bilim berý salasyna sińirgen qyzmetiniń mańyzyn da atap ótti.
– Mektep muǵalimdiginen bastalǵan eńbek jolyńyz ben búgingi jetken bıik belesińiz áriptesterińiz ben shákirtterińizge úlgi-ónege. Sizden tálim men tárbıe alǵan qanshama maman jas býyndy ustamdylyqqa, ultjandylyqqa úıretti. Pedagog – qoǵamnyń zııatkerlik áleýetin qalyptastyrady. Bilimdi urpaq pen myqty memlekettiń kepili bolatyn óskeleń jasqa sapaly bilim, sanaly tárbıe berýdegi Sizdiń qyzmetińizdiń mańyzy hám ómirsheńdigi dáleldeýdi qajet etpeıtin aksıoma ekendigi belgili. «Alashtyń Aıagúli» atanǵan Sizdiń ultymyzdyń oqý-aǵartý salasyna sińirgen eńbegińiz ben keıinge qaldyrǵan rýhanı murańyz áli de talaı jandar úshin, ásirese, bolashaq muǵalimder úshin shamshyraq bolatynyna kámil senimdimin, deıdi J. Sultanova.
О́z kezeginde Aıagúl Mırazova otandyq joǵary bilikti pedagog kadrlar daıarlatyn birden-bir kóshbasshy oqý orny Qazaq ulttyq qyzdar pedagogıkalyq ýnıversıtetiniń basshylyǵyna osyndaı ıgilikti iske muryndyq bolyp otyrǵany úshin rızashylyǵyn jetkizdi.
– Bul qarashańyraqta ultymyzdyń mańdaıyna bitken birtýar azamattar qyzmet atqaryp, qazaq halqynyń maqtanyshyna aınalǵan qanshama arýlar bilim aldy. Sizder de sol aǵa býynnyń izin basyp, ulaǵat uıasyna aınalǵan oqý ornynda bilim alyp jatyrsyzdar. Teginde, jaqsy ustazǵa qyzyǵyp ósken, oǵan elikteıtin shákirttiń de jany jaqsylyqqa qumar bolady. Bulaı dep otyrǵanym beker emes. Biz de sizder sııaqty stýdent boldyq. El qatarly bilim aldyq. Taraz memlekettik pedagogıkalyq ınstıtýtynyń Matematıka fakýltetine oqýǵa tústim. Instıtýtta bilikti ustazdardan tálim aldyq. Sabaqty jaqsy oqıtynmyn, oqý ornynyń qoǵamdyq jumysyna belsene qatysatynmyn. Aýyldyq eldimekenderge, mal fermalaryna baryp, konsert qoıatynbyz. О́nerge jaqyn boldyq. Almatydan shyǵatyn bedeldi gazet-jýrnaldarǵa tyrnaqaldy maqalamyzdy, óleńderimizdi jiberetinbiz. Ádebı kitaptardy jata-jastana oqydyq. Sonyń da áseri bolýy kerek, armanymyz kóp edi. Arman – adamdy alysqa jeteleıdi ǵoı. Qarshadaı qyzǵa maqsat bitirgen de sol kóńil túkpirindegi arman-maqsatymyz, – dedi óz sózinde Aıagúl Mırazova.
Sondaı-aq ol bilim salasyndaǵy ózgerister jaıyn da qaýzady.
– Elimiz egemendik alyp, táýelsizdikke qol jetkizgen soń bilim salasynda óte úlken ózgerister boldy. Eleýli jetistikterge jettik. Tabystarymyz da az emes. Osy jyldary Qazaq eliniń túkpir-túkpirinde júzdegen zamanaýı bilim ordalary – mektepter, balabaqshalar salynyp jatyr. Qarakózderimiz Elbasynyń bastamasymen dúnıege kelgen «Bolashaq» baǵdarlamasy arqyly álemniń bedeldi ýnıversıtetterinde oqyp, bilimimen, biliktiligimen sheteldi moıyndatyp jatyr. Joǵary mektepterdiń de materıaldyq-tehnıkalyq bazasy sońǵy úlgimen jaraqtaldy. О́zimizdiń tól oqýlyqtarymyz jazyldy. Qazaq tilindegi mektepter sany aıtarlyqtaı kóbeıdi. О́zimizdiń ulttyq bolmysymyzdy, qundylyǵymyzdy, salt-dástúrimizdi urpaǵymyzdyń boıyna quıýda qazaq mektepteriniń mańyzy zor. Balabaqsha jasynan bastap, naǵyz qazaq tildi urpaqty qalyptastyrý arqyly biz memlekettiń erteńin jasap jatyrmyz dep tolyq senimmen aıta alamyn, – degen ustaz muǵalim mamandyǵynyń bedeli týrasynda da sóz qozǵady.
Aıagúl Mırazovanyń aıtýynsha, ustaz baqyty – óz shákirtimen birge qýana bilý. Onyń mindeti – talapty jastyń shamshyraǵyn jaǵa bilý.
– Otandy súıý – otbasydan bastalady. Urpaq tárbıesinde tek muǵalimge ǵana emes, sondaı-aq ata-anaǵa da júkteler jaýapkershilik úlken. Bizdiń bul ómirde tek bir otanymyz bar. Ol – Qazaqstan. Keleshek jastardyń qolynda. Sondyqtan da, týǵan elin jan-tánimen súıetin, ata-anasyn álpeshteıtin, ustazyn syılaıtyn azamattardy tárbıelep ósirsek, bul mindetimizdiń oryndalǵany. Ustazdyń júgi jeńil emes. Sizder bolashaq ustazsyzdar. Elimizdiń tutas bir býynyn tárbıeleý sizderdiń enshilerińizge buıyryp tur. Bolatyn adam bıikke umtylady. Al sol bıik beles eseli eńbekpen keledi. Sondyqtan da qashanda izdenip, bilimge berilgen ýaqytty bilimge arnańyzdar degim keledi. Búgingi ýaqyt – bilimniń ýaqyty. О́rkenıettiń kóshine ilesý úshin tereń hám sapaly bilim bolý qajet, deıdi Aıagúl Tóreqyzy.
Jıyn barysynda Qyzdar ýnıversıtiniń stýdentteri Altynaı Jáńgir ásem ánin áýeletse, Mádına Áblez qazaqtyń birneshe kúıin naqyshyna keltire oryndady. «Aq qaýyrsyn» jas aqyndar klýbynyń múshesi Tolǵanaı Alpysbaeva men Mádına Darkenbaeva Aıagúl Mırazovaǵa arnaǵan arnaýy da kesh ajaryn asha tústi.
Taǵylymdy sharany Jańagúl Sultanova qorytyndylap, ustazǵa ýnıversıtet ujymy atynan rızashylyǵyn bildirip, syı-sııapat kórsetti.