Tuńǵysh Prezıdent Nursultan Nazarbaev elorda turǵyndary men qonaqtary aldynda sóılegen sózinde barsha jurtty Qazaqstan halqynyń birligi kúnimen quttyqtady.
– Babalarymyz birliktiń arqasynda barlyq qıyndyqty eńserip, biz úshin osyndaı Uly dalany saqtap qaldy. Biz birge olardyń armanyn oryndap, táýelsiz Qazaqstandy qurdyq, – dedi Nursultan Nazarbaev.
Elbasy zamanaýı Qazaqstan barlyq jetistikke qoǵamdaǵy birliktiń arqasynda qol jetkizgenin atap ótip, bárin beıbit ómir men turaqtylyqty baǵalaýǵa jáne saqtaýǵa shaqyrdy.
– Biz – baqytty halyqpyz. Birligimizdi saqtap, táýelsizdigimizdi qurmetteýimiz kerek. Damý baǵdarlamalarymyzdy júzege asyrý elimizdiń bolashaǵyn odan ári jarqyn ete túsedi, – dedi Tuńǵysh Prezıdent.
Nursultan Nazarbaev álemde etnosaralyq qaqtyǵystardyń saldarynan týyndaıtyn qazirgi zamanǵy syn-tegeýrinderge toqtaldy.
– Ár úıge, ár otbasyna bereke, baqyt, amandyq jáne erteńgi kúnge degen senimdilik tileımin. Meıramdaryńyzben! – dep túıindedi Elbasy.