Kóptegen ulttar men ulys ókilderin tatýlyqtyń besiginde terbetken Táýelsiz elimizdiń rýhanı astanasy sanalatyn Almaty jurtshylyǵy ataýly merekeni aıryqsha saltanatpen atap ótti. Merekelik sharaǵa arnaıy qatysqan Qasym-Jomart Toqaev barsha Qazaqstan halqyn yntymaq kúnimen quttyqtady.
– Qurmetti áleýmet, qadirli qaýym, ardaqty Almatylyqtar! Búgin erekshe kún. Tatýlyq merekesi. Elimiz bul merekeni erekshe jaqsy kóredi. Sondyqtan barshańyzdy shyn júrekten quttyqtaımyn. Ult pen ulystyń yntymaǵyn dáripteıtin osynaý merekeniń qadir-qasıetin bárimiz jaqsy bilemiz. Eki kún buryn ǵana ótken Qazaqstan Halqy Assambleıasynyń basqosýynda sóılegen sózinde Elbasymyz el ishindegi myzǵymas tatýlyqtyń mańyzdylyǵyn atap ótti. Tarıhtyń san qıly syn saǵattarynda qazaq jerin panalap kelgen kóptegen ult ókilderi bir úıdiń balasyndaı týys baýyr boldy. Zamannyń taýqymetine qaramastan bizdiń halqymyz solardyń bárin baýyryna basyp, barymen bólisti. Egemendik alǵan jyldary kóp etnosty, kóp konfessııaly elimizdiń keleshegi týraly túrli teris boljamdar aıtyldy. Alaıda, Elbasymyzdyń arqasynda Qazaqstan búginde túrli etnos ókilderiniń kıeli shańyraǵyna aınaldy. Abyroıly, bedeldi memleket boldy. Ortaq otanymyzdaǵy beıbitshilik pen kelisim el damýynyń berik negizine aınaldy. «Birińdi qazaq, biriń dos, kórmeseń istiń bári bos», – dep uly Abaı aıtqandaı, biz elimizdiń jemisti ári jeńisti kúnderine yntymaǵymyz arqyly jettik. Qymbatty almatylyqtar, tabıǵaty tańǵajaıyp arý almaty biregeı, balamasy joq shahar. Onyń jylnamasy búkil Otanymyzdyń jarqyn aınasy. Almaty azattyǵymyzdyń besigi bolǵan, eldigimizdiń irgesi qalanǵan qasterli qala. Jas memleketimizdiń jetistikterin dúnıejúzine alǵash tanytqan da osy Almaty. Alataý baýraıyndaǵy ásem shahar búginde qazaq zııalylarynyń qutty mekeni bolyp otyr. Almaty ǵylymnyń ordasy, ónerdiń besigi, shyǵarmashylyqtyń shańyraǵy, – dedi Qazaqstan Respýblıkasynyń Prezıdenti Qasym-Jomart Toqaev.
Myńdaǵan Almatylyqtyń basyn qosqan saltanatty sharada elimizdi mekendegen túrli ulttardyń tanym-tarıhynan syr shertetin arnaıy kórmeler uıymdastyrylyp, Otandyq ónerpazdar án men kúıden shashý shashty.
«Jigitter» kvarteti, «Saltanat» bı ansambli, «Asylym» bı toby, Ardaq Balajanova, Merýert Túsipbaeva, Álı Oqapov, Dınara Sultan, Kámshat Joldybaeva syndy taǵy basqa da ónerpazdar merekeniń ajaryn arttyrdy.
Eske salsaq, Memleket basshysy Qasym-Jomart Toqaev keshe Almatyǵa jumys saparymen kelip, megapolıstegi mádenı-áleýmettik nysandardy aralap, Almaty qalasyn damytý jóninde birqatar naqty tapsyrmalar bergen bolatyn.
ALMATY