Til úırenýge talap pen tabandylyq kerek

Ataýly shara Jastar jylynyń aıasynda uıymdastyryldy. Baq synaýshylar ár aımaqtaǵy joǵary oqý oryndarynda irikteýden ótken. Shet tilderi kafedrasynyń meńgerýshisi, dosent Jannat Elemesqyzy bıyl 98 stýdent qatysyp otyrǵanyn aıtty. «Respýblıkanyń ár túkpirinen jetken jalyndy jastardyń basyn qosatyn olımpıadany fılologııa fakýltetiniń shet tilder kafedrasy bes jyldan beri uıymdastyryp keledi. Bul shara stýdentterdiń shet tilderin oqýǵa degen yntasyn arttyrý, bilim alýshylardyń áleýmettik-mádenı jáne lıngvo-mádenı quzyrettiligin keńeıtýdi kózdeıdi. Bıylǵy qatysýshylardyń 32-si nemis tilinde, 62-si aǵylshyn tilinde baq synady», deıdi. Onyń aıtýynsha, Marcello Lopez Lara, Stephanie R. Olson sekildi sheteldik mamandar men «Inter press» Halyqaralyq til ortalyǵynyń Qazaqstandaǵy fılıalynan kelgen ádisker úzdikterdi anyqtaýda táýelsiz sarapshy boldy. Al olımpıadany uıymdastyrýǵa AQSh, Germanııa men Brıtanııa elshilikteri qoldaý kórsetken. 

Saıys eki týrdan turdy. Birinshi kezeńde qatysýshylar tildiń B1/B2 deńgeıinen tyńdalym, leksıka-grammatıka jáne oqylym boıynsha test tapsyrsa, ekinshi týrda «Búgingi jas – erteńgi bolashaq» (Today’s Youth – Tomorrow’s Future) taqyrybynda joba qorǵady. Testileýge 2 saǵat bólinse, ekinshi kezeńdegi ár prezentasııaǵa 5 mınýt ýaqyt berilgen. 

Olımpıadaǵa qatysýshy Ersultan Omar Sultanmahmut Toraıǵyrov atyndaǵy Pavlodar memlekettik ýnıversıtetiniń «Sáýlet-qurylys» fakýltetinde oqıdy. «Osyǵan deıin oblystyq oqýshylar arasynda ótken tildik olımpıadaǵa qatystym. Respýblıkalyq deńgeıdegi baıqaýǵa alǵash kelip turmyn. Birinshi týrda burynnan tanys testileý boldy. Men úshin ekinshi kezeń qyzyq bolyp tur. О́ıtkeni onda tildi qalaı meńgergeniń ǵana emes, ıdeıań, oıyń jáne ony jetkizý qabiletiń synǵa túsedi», dedi Ersultan. 

Qatysýshylardy ǵana emes, bizdi de qyzyqtyrǵan ekinshi kezeńde iriktelip shyqqan 26 bala óz ıdeıalaryn belgilengen mejede qorǵap shyqty. Barlyǵy oıyn aǵylshyn jáne nemis tilderinde erkin jetkizdi. Sonyń biri, Eýrazııa ulttyq ýnıversıtetiniń stýdenti Dinmuhamed Baıandyny qazylardyń tosyn suraqtary ózgelerdeı tosyrqatpaı, kerisinshe qoldaý bolypty. «Amerıkalyq qazy ıdeıam týraly suraǵanda keńinen ashyla tústim. Jetpegen ýaqytty tolyqtyrýǵa kómektesti. Men prezentasııamda keleshekke qajetti daǵdylardy kórsettim», deıdi bolashaq bıolog. Olımpıada qo­rytyndysy boıynsha Eýrazııa ulttyq ýnıversıteti, S.Seıfýllın atyndaǵy qa­zaq agrotehnıkalyq, Iаsaýı atyndaǵy halyqaralyq jáne Soltústik Qazaqstan, Pavlodar, Qaraǵandy, Shyǵys Qazaqstan memlekettik ýnıversıtetteriniń stý­dentteri júldeli oryndarǵa ıe boldy. Olarǵa joǵaryda atalǵan elshilikterdiń qundy, til úıretý kitaptary tabys etildi.