Altynshy ret ótip jatqan prezıdenttik saılaýǵa úmitkerlerdi tirkeý merziminen buryn aıaqtaldy. Ortalyq saılaý komıssııasy 8 mamyrǵa deıin prezıdenttikke jeti kandıdatty tirkedi. Olar: Nur Otan partııasynan – Qasym-Jomart Toqaev, «Uly dala qyrandary» respýblıkalyq qozǵalysynan – Sádibek Túgel, Qazaqstan Respýblıkasynyń Kásipodaqtar federasııasynan – Amangeldi Taspıhov, «Aq jol» Qazaqstannyń demokratııalyq partııasynan – Danııa Espaeva, «Aýyl» halyqtyq-demokratııalyq patrıottyq partııasynan – Tóleýtaı Rahymbekov, Qazaqstan Kommýnıstik halyq partııasynan – Jambyl Ahmetbekov, «Ult taǵdyry» ulttyq-patrıottyq qozǵalysynan – Ámirjan Qosanov.
Úgit-nasıhat jumystary úsh negizgi tásilmen – buqaralyq aqparat quraldary arqyly, kandıdattardyń jáne olardyń senim bildirilgen adamdarynyń saılaýshylarmen kezdesýleri, sondaı-aq, baspa, dybys-beıne jáne basqa úgit materıaldaryn shyǵarý, taratý arqyly júzege asyrylady.
Saılaýaldy naýqan 8 maýsymǵa deıin jalǵasady, ol kún tynyshtyq kúni bolyp belgilengen. Al 9 maýsymda saǵat 07.00-den bastap 20.00-ge deıin daýys berý prosesi júredi. Daýystardy sanaý 12 saǵatta iske asady.
* * *
Qazaqstan prezıdenttigine kandıdat Qasym-Jomart Toqaev Respýblıkalyq qoǵamdyq shtabqa kelip, onyń qyzmetkerlerimen, belsendilerimen kezdesti. Nur Otan partııasy Ortalyq apparatynyń ǵımaratynda Jumysty uıymdastyrý ortalyǵy, Josparlaý, saraptaý, jáne monıtorıng ortalyǵy, Qarjylyq qoldaý ortalyǵy, Quqyqtyq saraptaý ortalyǵy, Logıstıka jáne materıaldyq qamtamasyz etý ortalyǵy, Baspasóz ortalyǵy jáne respýblıkalyq qoǵamdyq shtabtyń «Team Qazaqstan» jastar qanatynyń jumystarymen tanysty.
«Bizdiń saılaýaldy baǵdarlamamyz sabaqtastyq, ádildik jáne órleý degen negizgi úsh qaǵıdaǵa taban tireıdi. О́ıtkeni Elbasy saıasatynyń sabaqtastyǵy ǵana elimizdiń qarqyndy damýyn qamtamasyz etedi. Azamattar úshin eń mańyzdysy – ál-aýqattyń artýy. Bizdiń ekonomıkalyq jetistikterimizdi ár qazaqstandyq sezinýi tıis. Bul – ádildiktiń belgisi. Sondyqtan aldymyzǵa naqty maqsattar qoıyp otyrmyz. Oǵan qol jetkizý úshin biz úzdiksiz damyp, únemi órlep, órkendeýimiz kerek» dedi Qasym-Jomart Toqaev.
Jalpy, respýblıkalyq qoǵamdyq shtabqa 190 adam kirgen, onyń 30-y – «Team Qazaqstan» jastar qanatynyń múshesi. El aýmaǵynda 17 aımaqtyq, 210 qalalyq jáne aýdandyq qoǵamdyq shtab jumys istep, onda 6 myńǵa jýyq adam qyzmet kórsetedi. Kandıdattyń 19 500 senim bildirilgen ókili bar.
* * *
«Aýyl» halyqtyq-demokratııalyq patrıottyq partııasynyń atynan prezıdenttikke kandıdat Tóleýtaı Raqymbekovtiń shtaby jumysyn bastady. Shtab basshysy Álı Bektaevtyń aıtýynsha, buǵan deıin arnaıy semınar-trenıngter uıymdastyrylyp, shtab mamandary úgit-nasıhat júrgizýdiń erejelerimen tanysyp shyqty. Al zańgerler partııa múshelerine «Saılaý týraly» zańnyń baptaryn túsindirdi. Úgit-nasıhat jumystaryna qajetti plakattar, ún-paraqtar men partııanyń baǵdarlamasy basyldy. Á.Bektaev partııanyń saılaýaldy baǵdarlamasy aldymen gazetterde, odan keıin telearnalarda jarııalanatynyn, jalpy on kún ishinde buqaralyq aqparat quraldary arqyly halyqqa taratylatynyn jetkizdi. Baǵdarlama broshıýra úlgisinde de ázirlengen. Partııa úgit-nasıhat jumystary aıasynda 100-den asa shara uıymdastyrmaq.
Respýblıkalyq qoǵamdyq shtabqa qosa, 17 aımaqta 17 óńirlik shtab qurylǵan. Árbir qala men aýdanda partııa úshin daýys berýge úgitteıtin toptar jumys isteıdi. Qazir olarǵa kerekti nasıhat paraqshalary men saılaýaldy baǵdarlamasy bar kitapshalar jiberilip jatyr. Úgit-nasıhat kezinde aımaqtarǵa issaparlar, jumysshy ujymdarmen kezdesýler, fleshmobtar men túrli aksııalar ótkizý josparlanǵan.
* * *
Nur-Sultan qalasynda Kásipodaqtar federasııasy atynan prezıdenttikke kandıdat Amangeldi Taspıhovtyń respýblıkalyq qoǵamdyq saılaýaldy shtaby ashyldy. Shtabqa Kásipodaqtar federasııasynyń tóraǵasy Baqytjan Ábdiraıym jetekshilik etedi. Shtab quramyna kásipodaq uıymdarynyń basshylary, bedeldi ulttyq sarapshylar, kásibı zańgerler, ǵylym qaıratkerleri men Kásipodaqtar federasııasynyń «Keleshek» jastar qozǵalysynyń belsendileri kirdi. Ortalyq shtab elimizdiń barlyq oblystary men Nur-Sultan, Almaty jáne Shymkent qalalarynda ashylǵan aımaqtyq qoǵamdyq shtabtardyń jumysyn úılestiredi.
Sondaı-aq Kásipodaqtar federasııasynyń quramyndaǵy 18 myń bastaýysh uıymdarda bastaýysh qoǵamdyq pýnktteri ashylyp jatyr. Kásipodaqtar federasııasy bazasynda qurylǵan ortalyq shtabta qoǵamdyq qabyldaý bólmesi uıymdastyrylyp, jedel baılanys ortalyǵy jumys isteıdi. Kandıdattyń úgit-nasıhat jumystaryna qajetti bannerler, bılbordtar, rolıkter, broshıýralar, t.b. ónimder jasalyp, barlyq óńirge jetkizildi. Úgit-nasıhat naýqany barysynda 400-den asa is-shara josparlanǵan.
* * *
Qazaqstan Respýblıkasynyń Prezıdenttiginen úmitker tuńǵysh áıel, «Aq jol» Qazaqstannyń demokratııalyq partııasynyń atynan saılaýǵa túsip jatqan Danııa Espaeva óziniń saılaýaldy úgit naýqanyn elimizdegi iri naýbaıhanalardyń biri «Aqsaı-nan» JShS ujymymen kezdesýden bastady.
Partııa tóraǵasy Azat Perýashev bastaǵan respýblıkalyq shtab ókilderi Almatydaǵy atalǵan naýbaıhananyń eńbek ujymyna saılaýaldy baǵdarlamanyń negizgi baǵyttaryn aıtyp berdi. Ol – kásipkerlikti qoldaý, ulttyq táýelsizdik jáne jemqorlyqpen kúres. Kásiporyn ókilderi baǵdarlamada aıtylǵan áleýmettik ónimder óndirisine salyqty tómendetýdi, bıznesti nesıeleýdiń merzimin uzartýdy quptady. Jıynda jumysshylardyń denin áıelder quraǵandyqtan, zeınet jasyna qatysty suraqtar qoıyldy. Qalada tirkelmegen kóp balaly otbasylarǵa járdemaqy rásimdeý, baspanaǵa qol jetkizý máseleleri kóterildi. A.Perýashev turǵylyqty jeri boıynsha tirkeýde joq azamattar jumys ornynan tirkele alatynyn jetkizdi.
* * *
Qazaqstan Kommýnıstik halyq partııasy qalalyq, oblystyq, respýblıkalyq deńgeıdegi saılaýaldy naýqanǵa kiristi. Partııa prezıdenttikke kandıdat Jambyl Ahmetbekovtiń respýblıkalyq saılaýaldy shtabyn tanystyrdy. Respýblıkalyq saılaýaldy shtab jetekshisi bolyp QKHP Ortalyq komıtetiniń hatshysy, «Halyq kommýnısteri» fraksııasynyń jetekshisi, Parlament Májilisiniń depýtaty Aıqyn Qońyrov bekitildi. Shtab jetekshisi A.Qońyrov kandıdat J.Ahmetbekovpen birge respýblıkalyq saılaýaldy shtabynyń lentasyn kesti. Buǵan qosa oblystardaǵy aımaqtyq saılaýaldy shtabtar ashyldy.
Jambyl Ahmetbekov jýrnalısterge arnalǵan brıfıngte: «Saılaýaldy tuǵyrnamamyzdy halyqqa jetkizý úshin erteńnen bastap aımaqtarǵa issaparǵa shyǵamyz. Saılaýaldy naýqan kezinde partııanyń baspasóz qyzmeti úzdiksiz jumys isteıdi. Baspasóz qyzmetin Nazgúl Maqjan basqarady», dedi.
* * *
«Ult taǵdyry» ulttyq-patrıottyq qozǵalysy atynan prezıdenttikke usynylǵan úmitker Ámirjan Qosanov saılaýaldy naýqan aıasyndaǵy alǵashqy kezdesýin Soltústik Qazaqstan oblysynan bastady.
Kandıdat óziniń respýblıkalyq shtab ókilderimen birge Maǵjan Jumabaev aýdany Býlaevo qalasyna bet alyp, Batyr Baıan men Maǵjan Jumabaevtyń eskertkishterine bardy. Á.Qosanov atalǵan qalanyń ortalyq kitaphanasynda jergilikti turǵyndarmen dıdarlasyp, óziniń saılaýaldy tuǵyrnamasynyń basym baǵyttaryn tanystyrdy. Onyń saılaýaldy tuǵyrnamasy «Saıası bostandyqtar», «Ulttyq bolmys», «Sóz júzindegi emes, is júzindegi táýelsizdik», «Jemqorlyqqa jol joq», «О́rkenıetti ári halyqshyl ekonomıka», «Baqýatty aımaqtar – baqýatty memleket» atty 6 bólimnen turady. Onda kandıdattyń saılaýda jeńiske jetken jaǵdaıda, memleket ómirinde qandaı ózgerister bolyp, elimizdiń qaı baǵytpen damıtyny týraly josparlary qamtylǵan.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgel úgit-nasıhat jumystaryn aldymen elordanyń kireberisindegi Qulager eskertkishiniń janynda Nur-Sultan qalasy men Shortandy aýdanynyń qurmetti aqsaqaldarymen kezdesýden bastady. Ol «Uly dala qyrandary» qoǵamdyq birlestiginiń teń tóraǵasy, shtab jetekshisi Marat Nábıevpen birge jınalǵan qaýymǵa saılaýaldy baǵdarlamasyn tanystyrdy.
Bıyl «Qulager» poemasynyń avtory Ilııas Jansúgirovtiń týǵanyna 125 jyl tolady. Sondyqtan Qulager eskertkishi ıdeıasynyń avtory ári ony ornatqan azamat Sádibek Túgeldiń aqsaqaldardyń batasyn alý úshin osynda kelýiniń mańyzy zor. Kandıdat qarııalarmen kezdesýinde óziniń saılaýaldy baǵdarlamasyndaǵy negizgi mindetterge toqtaldy. Jastardy ulttyq qundylyqtardy ulyqtaý men otansúıgishtikke tárbıeleý, memlekettik tildi damytý jáne halqymyzdyń mádenıeti men salt-dástúrin nasıhattaý turǵysyndaǵy ustanymdaryn jetkizdi.
S.Túgelge eńbek ardagerleri – Kamelıash Shoshaı, Shaızanhan Qumarııa jáne Aryqqara Qapı, memleket jáne qoǵam qaıratkeri Qydyrbaı Nurpeıisov, Qazaqstannyń eńbek sińirgen dárigeri Aldabergen Omarbekov jyly lebizderin bildirip, aq batalaryn berdi.
Daıyndaǵan Orynbek О́TEMURAT,
«Egemen Qazaqstan»