Qazaqstandyq boksshy Batyr Júkembaev meksıkalyq Lýıs Hesýs Vıdalespen (13-6, 6KO) jekpe-jegin ótkizip, jeńiske jetti, dep habarlaıdy Sports.kz.
Jartylaı orta salmaqtaǵy 10 raýndtyq jekpe-jek Kanadanyń Monreal qalasyndaǵy Montreal Casino oıyn-saýyq kesheninde ótti. Kezdesýdiń birinshi raýndynda Batyr Júkembaev qarsylasy Lýıs Hesýs Vıdalesti tehnıkalyq nokaýtqa túsirip, kezekti jeńisine qol jetkizdi.
«Kotto» laqap atymen belgili meksıkalyq Lýıs Hesýs Vıdales 30 jasta. Ol 2011 jyldan beri kásipqoı boksta. Bir kezdesýden basqasynyń bárin Meksıkada ótkizgen. Júkembaev sońǵy aıqasyn dál osy Monreal qalasynda ótkizip, meksıkalyq Hılberto Mesany (10-5-1, 6 KO) tóreshilerdiń biraýyzdy sheshimimen jeńgen edi.