QR Tuńǵysh Prezıdenti – Elbasy Nursultan Nazarbaev atap ótkendeı, Shymkent Ortalyq Azııanyń qýatty ekonomıkalyq ortalyǵyna, qonaqtar men turǵyndarǵa arnalǵan qolaıly jaǵdaılar jasalǵan iri ári tartymdy megapolıske aınalýy tıis.
QR Úkimetiniń basshysy jumys sapary barysynda megapolıs tóńiregindegi ınfraqurylymdyq jáne áleýmettik jobalardyń iske asyrylýyn tekserdi. «Turan» shaǵyn aýdanynda uzyndyǵy 3,3 shaqyrym bolatyn úsh magıstraldi kósheniń biri — jol ınfraqurylymynyń qurylysy qaraldy. Premer-Mınıstrge osy jyldyń sońyna deıin joldyń paıdalanýǵa beriletini baıandaldy. Turǵyndarǵa qolaıly bolýy úshin velosıped joldary qarastyrylǵan. Jalpy, atalǵan turǵyn shaǵyn aýdanda 7,7 shaqyrym jol ınfraqurylymy qurylys jumystarymen qamtylǵan.
«Nurly jol» memlekettik baǵdarlamasy aıasynda 2022 jyldyń III toqsanynyń sońyna deıin jańa avtomattandyrylǵan gaz taratýshy stansııa salynady, ol artyp kele jatqan suranysty eskere otyryp, shalǵaıdaǵy eldi mekenderdiń, sonyń ishinde «Turan» shaǵyn aýdanynyń turǵyndaryn gazben qamtamasyz etýge jol ashady. Qala tóńiregindegi turǵyn úılerdi elektrmen jabdyqtaý úshin elektr jelilerin salý jumystary pysyqtalýda.
QR Premer-Mınıstri «Bozaryq 220/110/10 kV» qosalqy stansııasynyń qurylysy júrip jatqan jerde jobany ýaqytyly aıaqtaý máselesine erekshe kóńil bóldi. Qalany damytýdyń 2030 jylǵa deıingi bas jospary aıasynda Shymkenttiń soltústik bóliginde turǵyn úı qurylysy júrgizilip jatyr, bul elektr qýatynyń qosymsha kózin salý jumystaryn jandandyrýdy talap etedi.
Qala ákimdiginiń málimetterine sáıkes, «Bozaryq 220/110/10 kV» bıyl qarasha aıynda paıdalanýǵa beriledi. Sonyń nátıjesinde, shamamen 250 myń adam turatyn 10 jańa turǵyn úı alaby úzdiksiz elektr qýatymen qamtamasyz etiledi.
«Tassaı» ındýstrııalyq aımaǵynyń aýmaǵynda Premer-Mınıstr A. Mamın «Asia Trafo» JShS jańa zaýytynyń tehnologııalyq óndiristik prosesimen jáne elektrotehnıkalyq zerthanasynyń jumysymen tanysty. Indýstrııalyq-ınnovasııalyq damý memlekettik baǵdarlamasy aıasynda iske qosylǵan kásiporyn qýattylyqtary 110-220, 500 kV deıin jetetin transformatorlar shyǵarady. Bıyl 7 mlrd teńge somasyna ónim shyǵarý josparlanǵan. Jyl saıynǵy kólemi 120 birlikti quraıtyn joǵary sapaly zamanaýı óndiristi jergiliktendirý ishki naryq qajettilikterin qanaǵattandyryp, energetıkalyq jabdyqtardyń 40%-ǵa jýyǵyn TMD, Iran, Aýǵanstan, Pákistan jáne t.b. elderge eksporttaýǵa múmkindik beredi. Kásiporynda 220 adam jumys oryndarymen qamtylǵan.
Jumys istep turǵan kásiporyndardy tekserý qorytyndysy boıynsha QR Úkimetiniń basshysyna qurylýy qolda bar aýmaqtardy barynsha tolyqtyrýǵa baǵyttalǵan «Juldyz» kópsalaly ındýstrııalyq aımaǵy jáne megapolıstiń azyq-túlik qaýipsizdigi beldeýin qamtamasyz etýge baǵyttalǵan «Shymkent» agro-ındýstrııalyq aımaǵy tanystyryldy.
Elbasy tapsyrmasy boıynsha damytýǵa 600 mlrd teńge qarajat bólingen «qarapaıym zattar ekonomıkasy» máselesine erekshe kóńil bólindi. Premer-Mınıstrge halyq tutynatyn taýarlar óndirisin arttyrý úshin qolaıly jaǵdaılar jasalǵany baıandaldy. Sonyń nátıjesinde, búgingi tańda megapolıs úlesine Qazaqstannyń jeńil ónerkásibi kóleminiń 23% tıesili.