Marafonnyń eń uzyn qashyqtyǵy – 21 shaqyrymdyq synda Belarýssııa men Qyrǵyzstannan kelgen atletter Vladıslav Prıamov pen Darıa Maslova top jardy. Aıta ketý kerek, belarýs jelaıaǵy Vladıslav Prıamov osymen ekinshi ret atalǵan marafonnyń jeńimpazy atanyp otyr.
Armanǵa jol-2019 jartylaı marafonynda 2 shaqyrymdyq «Balapan» synynda Habylhan Alpamys pen Anastasııa Svırkýnova, «Dostyq» synynda (7 km) Qudaıbergen Zeınollaev pen Vıktorııa Senkına jeńimpaz atandy.
Bıyl birinshi ret skandınav júrisi boıynsha uıymdastyrylǵan «Dostyq» dodasynda (7 km) Asqar Jańabergenov pen Ásel Asanova aldyna jan salmady.
Múmkindigi shekteýli jandar arasyndaǵy «Dostyq» saıysynda Botakóz Aqylbekova úzdik shyqty.
18-34 jas aralyǵyndaǵy jelaıaqtar jarysynda (14 km) Erjan Janarystanov pen Ekaterına Grısaı birinshi orynǵa ıe boldy. 51-65 jas aralyǵyndaǵy «Spýtnık» dep atalǵan synda Sergeı Polıkarpov pen Telǵonaı Shaaeva úzdik shyqty.
Jastary 70-ke jetken egde jelaıaqtar arasyndaǵy jarysta Bıebaı Tilemisov pen Ámegúlsin Musylmanova birinshi bolyp máre syzyǵyn qıdy.
– Jarys joly unady. Marafonnyń uıymdastyrylýy da joǵary deńgeıde ótti. Jyl boıy bar kúshimdi salyp jattyqtym. Byltyrǵy jylǵy rekordymdy jańarta almaǵanym ras. Degenmen, birinshi oryn maǵan buıyrdy, – dedi jartylaı marafonnyń erler arasyndaǵy jeńimpazy Vladıslav Prıamov.
– Júgirý meniń jumysym. Qaraǵandy marafonyna men birinshi ret qatysyp otyrmyn. Byltyr qurbym osy jarysqa qatysqan eken. Sonyń úgitteýiniń arqasynda men de bıyl baq synap, táp-táýir nátıjege qol jetkizdim, – dedi áıelder arasyndaǵy synnyń jeńimpazy Darıa Maslova.
Jartylaı marafonda jeńimpaz jáne júldeger bolǵan jelaıaqtar júlde qoryna dep tigilgen 8 mıllıon teńgeni ózara bólisti. Naqtyraq aıtar bolsaq, jeńimpaz atanǵan sportshylar 1 mln teńgeden syıaqy aldy.
– Jyl ótken saıyn jartylaı marafonǵa qatysýshylar sanynyń artyp kele jatqany qýantady, – dedi Qaraǵandy oblystyq dene shynyqtyrý jáne sport basqarmasynyń basshysy Dmıtrıı Karpov.
Armanǵa jol-2019 jartylaı marafonyn myńdaǵan jankúıer tamashalady.