«WorldSkills Shygys» jumysshy mamandyǵynyń mártebesin kóteredi

Quzyrettilik sany 43-ke kóbeıdi

«WorldSkills Shygys» aımaq­tyq chempıonatynyń mańyzy nede? Stýdentter úshin paıdasy qandaı? Baıqaýdyń negizgi uıym­dastyrýshysy oblystyq bilim basqarmasynyń bergen málimetterine júginsek, búginde Shyǵys Qazaqstandaǵy 86 kolledjde 35 myńǵa jýyq stýdent oqyp jatyr eken. Onyń 52 paıy­zy memlekettik tapsyryspen bilim alyp jatqan kórinedi. «Bıyl oblystyq bıýdjetten óńirdegi kolledjderge 6200, al Nátıjeli jumyspen qamtý jáne jappaı kásipkerlikti damytý baǵdarlamasy arqyly respýblıkalyq bıýdjetten 1730 orynǵa memlekettik tapsy­rys beriledi. Bul degenińiz – 8 myńǵa jýyq stýdentke mem­leket esebinen tegin oqý múmkindigi berilip otyr degen sóz. Biz mem­lekettik tapsyrys kólemin jyl saıyn ulǵaıtyp otyramyz. Oblystaǵy mektep túlekteriniń 40 paıyzy kolledjderdi tań­daıdy. Sondyqtan biz olardyń sapaly bilim alýyna, bilikti maman bolýyna mán berýimiz kerek. Barlyq jaǵdaıdy jasaýymyz qajet», dedi oblys ákiminiń orynbasary Ásem Núsipova «WorldSkills Shygys» aımaqtyq chempıonatynyń ashylý saltanatyna oraı ótkizgen baspasóz máslıhatynda.

Oblys ákimi orynbasarynyń aıtýynsha, bul baıqaýdy uıym­dastyrýdaǵy basty maqsat – soń­ǵy jyldary qoǵamda bede­li tómendep ketken jumysshy mamandyqtarynyń mártebesin kóterý jáne naryqta suranys­qa ıe mamandar daıarlaý. «Aımaq­taǵy kolledjderde mamandardy daıyndaý 115 maman­dyq boıynsha júrgizilýde. Búginde oblystaǵy 56 kolledj 560 kásip­orynmen birlese dýaldy oqytý tehnologııasyn júzege asyryp jatyr. Oblystyq bilim basqarmasy kadrlardy daıyndaý boıynsha 2017 jyly «Qazsınk» JShS-men, bıyl «KAZ Minerals» JShS-men memorandýmǵa qol qoıdy. Osy memorandým aıasynda Aıagózdegi polıtehnıkalyq kolledj ben О́skemendegi kópsalaly tehnologııalyq kolledjge zamanaýı qurylǵylar ornatylady. Oblys ákimdigi ǵımaratty kúrdeli jóndeýden ótkizýge kó­mek­tesedi», deıdi Á.Núsipova.

«WorldSkills» baıqaýynyń bir tıimdiligi, jastardyń ju­mysqa ornalasýyna múmkindik beredi. «KAZ Minerals Aktoqay» kom­panııasynyń basqarma basshysy Baýyrjan Abylqasymulynyń aıtýynsha, jýyrda Aıagózdegi jáne oblys ortalyǵyndaǵy bir­neshe kolledjdiń materıal­dyq-tehnıkalyq bazasy jań­ǵyrtylady. D.Serikbaev atyn­daǵy ShQMTÝ janyndaǵy joǵary tehnıkalyq kolledj, О́s­kemen kópsalaly tehno­lo­gııalyq kolledji, S.Aman­jo­lov atyndaǵy ShQMÝ-diń jo­ǵary kolledji jáne Aıagóz polıtehnıkalyq kolledjin zamanaýı oqý quraldarymen jabdyqtaý úshin kompanııa 380 mıllıon teńge qarajat bólmek. Negizgi ınvestısııa О́skemen kóp­salaly tehnologııalyq kol­ledjinde bes mamandyq boıyn­sha ashylatyn quzyrettilik ortalyǵyna jumsalady.

«WorldSkills Shygys» aımaqtyq chempıonatynda stýdentter byltyr 31 quzyrettilik (mamandyq) boıynsha synǵa tússe, bıyl 43-ke kóbeıipti. Ob­lystyq bilim basqarmasy basshy­synyń orynbasary Qa­­jymqan Ospanǵalıev «WorldSkills» baıqaýy respýblıkada 5-ret, al «Abilympics» kásibı sheberlik chempıonaty 2-márte uıym­dastyrylyp jatqanyn aıtady. «Bıyl múmkindigi shekteýli balalar arasyndaǵy «Abilympics» chempıonatyn ózimizde ótkizýdi uıǵardyq. О́ıtkeni oblys­ta ınklıýzıvti bilim berip otyr­ǵan bazalyq kolledjder bar. Bul – О́skemendegi qyzmet kór­setý salasy men kópsalaly teh­nologııalyq kolledjderi jáne Semeıdegi Shyǵys Qazaqstan tehnologııa kolledji. Bul qatarǵa Glýbokoe tehnıkalyq kolledji de qosylyp jatyr. Oblysta 400-den astam stýdent ınklıýzıvti bilimmen qamtylǵan. 2019 jyly «Abilympics» chempıonatyn úsh quzyrettilik («Shashtaraz isi», «Aqparattyq tehnologııa­lar» jáne «Sán tehnologııasy») boıyn­sha ótkizýge sheshim qabyl­da­dyq. Kelesi jyly quzyrettilik aıasyn keńeıtetin bola­myz», deıdi basqarma basshy­synyń orynbasary.

Múmkindigi shekteýli jandarǵa múmkindik bergen baıqaý

«Abilympics Shygys – 2019» kásibı sheberlik chempıo­naty óńirde alǵash ret uıymdas­ty­rylǵandyqtan bolar, bıyl bul saıysqa óńirdegi 8 kolledjden 13 múmkindigi shekteýli stýdent qatysty. О́skemendegi qyzmet kórsetý salasy kolledjinde ótken jarysqa ózimiz de arnaıy baryp, qatysýshylarmen, olarǵa baǵa bergen sarapshylarmen pikirlesip qaıttyq. Máselen, «Shashtaraz isi» quzyrettiligi boıynsha eki stýdent synǵa tústi. «Ekeýi de jaqsy jumys istedi. Shash úlgilerin jasady. Qoldary da ıkemdi. Jyldamdyqtary da jaqsy. Eńbektengenderi kórinip tur. Múmkindigi shekteýli demeseńiz, on eki múshesi saý stýdentterden jaqsy óner kórsetti. Olar kez kelgen shashtarazda jumys isteýge daıyn dep aıta alamyn», deıdi eki stýdenttiń jumysyna baǵa bergen qazylar alqasynyń múshesi Taıyrbek Tasylbaev.

«Sán tehnologııasy» quzyret­tiligi boıynsha 8 stýdent baq synady. «Áıel adamnyń jeı­desin (blýzka) tiktik. 6 saǵat ýaqyt berildi. 1 saǵat úzilis bol­dy. О́zim saǵat 9-da bastap, 2-de bitirdim. Kıim tikken­di jaq­sy kóremin», deıdi О́skemen­degi qyzmet kórsetý salasy kol­ledji­niń 3-kýrs stýdenti Áı­gerim Baıbosynova. Olardyń jumysy qazylar alqasynyń da kóńilinen shyqqan sekildi. «Jandary shyǵarmashylyqqa jaqyn ekendikteri kórinip tur. Baryn sala jumys istep jatyr. Baıqaýǵa qyzdarmen birge bir er bala da qatysty. Qazylar laıyqty baǵasyn beredi dep oılaımyn. Bizdiń tilek – osyndaı baıqaýlar kóbirek bolsa», deıdi qaladaǵy «Sılýet» atelesiniń qyzmetkeri Natalıa Gazeeva.

Saıysqa qatysýǵa Aqsýat aýylyndaǵy Tarbaǵataı kol­ledjin­de «dızaıner» mamandyǵy boıynsha oqyp jatqan Qýanysh Qanıbekov te kelipti. «Baıqaý unady. Birinshi ret qatysyp turmyn. Keleshekte atelede jumys istegim keledi», deıdi ol. Qyzmet kórsetý salasy kolledjiniń qyzmetkeri Dınara Ma­qulbekova «Aqparattyq teh­nologııalar», ıaǵnı úshinshi quzyrettilik boıynsha О́skemen, Semeı, Altaı qalalarynyń stýdentteri óner kórsetkenin jetkizdi. «Múmkindigi shekteýli balalar bolsa da «WorldSkills» tapsyrmalaryn alyp, shamamyz kelgenshe jeńildetip usyndyq. Olar eki modýl boıynsha jumys istedi. Birinshi modýl boıynsha jarnamalyq býklet jasasa, ekinshi modýlde ár bala óziniń oqıtyn oqý orny týraly eki-úsh mınýttyq beınerolık daıyndady. Densaýlyqtaryna baılanys­ty jarty saǵat saıyn demaldyryp otyrdyq. Barlyǵy da jaqsy jumys istedi», deıdi ol.

«Abilympics Shygys» kásibı sheberlik chempıonatyna oblys ákimi Danıal Ahmetovtiń bastamasymen О́skemende byltyr ashylǵan «Aq nıet» mektep-ınternatynyń oqýshylary men túlekteri de qatysty.

Úsh kúnge sozylǵan aımaq­tyq chempıonat aıasynda 7-11 synyptyń oqýshylaryna j­u­mysshy mamandyqtaryn dá­rip­teý maqsatynda Shyǵys Qa­zaq­stan gýmanıtarlyq kolledjiniń bazasynda «My PRO» mamandyqtar festıvali ótkenin de aıta keteıik. Fes­tıvalǵa oblysymyzdyń túk­pir-túkpirinen shaqyrylǵan tórt myńǵa jýyq oqýshy arnaıy jabdyqtalǵan alańdarda óńirdiń kolledjderindegi maman­dyqtarmen keńirek tanysyp, kóp balaly jáne áleýmettik jaǵynan az qamtylǵan otbasynyń balalaryna beriletin jeńildikter, stıpendııa kólemi, jataqhanamen qamtylýy, túlekterdiń jumysqa ornalasýy jaıynda maǵlumattar aldy.

Baıqaý qorytyndysynda Semeı elektrotehnıka kolledji 8 altyn, 4 kúmispen komandalyq esepte kósh bastasa, osy shahar­dyń Bıznes jáne servıs, Ra­dıo­tehnıka jáne baılanys kolledjderi ekinshi, úshinshi oryndardy ózara bólisti. «Bıyl bul chempıonatqa 12 stýdentimiz qatysyp, barlyǵy da júldeli boldy. Byltyr tek bir nomınasııa boıynsha synǵa túsip, bas júlde alǵanbyz. Oblysta jeńimpaz bolǵan stýdentimiz Isajan Raıysov keıin respýb­lıkalyq saıysta da 1 oryn aldy. Endi Tatarstanda ótetin álemdik jarysqa barady. Biz Tatarstan, Germanııa, Brazılııa elderimen tájirıbe almasyp, birlese jumys isteımiz. Búgingi jetistigimizge munyń da úlken áseri bolǵany anyq», deıdi Semeı elektrotehnıka kolledjiniń dırektory Azat Sarpekov.

Jeńimpazdardyń barly­ǵyna «Qazsınk» JShS, «Vostok­tehnoservıs» JShS, «Otel NOMAD-Semeı», «Semeı Kór­kem», «TasKredıt», «Shyǵys Ajar Torg», «Pınegına E. V», «VostokElıt-E», «Topaz», «Feklıstova A.F.», «Dedeman Oskemen Tavros», «Welding Company», «Glýbochanka», «Sılýet» atelesi, «Mereke», «Karavaı» kásiporyndarynyń demeýshiligimen aqshalaı jáne baǵaly syılyqtar tapsyryldy. О́ńirlik baıqaý jeńimpazdary aldaǵy ýaqytta Nur-Sultan qalasynda ótetin respýblıkalyq chempıonatta oblys namysyn qorǵaıtyn bolady.

О́SKEMEN