Áı, bul jumys degendi qoısańyzshy, á dep bastalǵannan-aq búkil dúnıeni umyttyryp jiberedi ǵoı. Kúndelikti abyr-sabyrmen júrip, kúnniń qalaı batqanyn da ańdamaı qalasyń.
Shynymdy aıtsam, úıge nemere aǵamnyń kelip jatqany esik aldyna jetkende bir-aq esime tústi. Sóıtip úıge kirsem, nemere aǵam máz-meıram. Qabaǵynda tıtteı de kirbiń joq. О́zine ózi rıza bolyp, kúlip júr.
– Áı, mynaý «Elarna» degeniń naǵyz myqty arna eken ǵoı, – deıdi jymıyp. – Jańa bir kúshti kıno kórdim!
– Qandaı kıno?
– «Balalyq shaqqa saıahat» dep atalady eken. Mine, naǵyz kınonyń kókesi!
– Oı, ol baıaǵyda túsirilgen fılm ǵoı. Nemene, buryn kórmep pe eń?
– Bilmeımin. Kórsem, kórgen shyǵarmyn. Biraq dál búgingideı áser alǵan emespin.
– Bárekelde-e, sóıtip, keshke deıin kınony azyq qyldym deseńshi.
– Dál solaı.
Sonsoń ol az-kem oılanyp, taǵy da basyn shaıqap otyryp:
– Áı, osyndaı kınolardy jıi-jıi kórsetip turý kerek qoı, – dedi. – Bóten emes, bógde emes, óz-z halqymyzdyń ómiri. Keshegi kúngi qazaqtyń qarapaıym tirshiligi. Sózderi qandaı mándi. Maǵynaly. Keıipkerleri qandaı súıkimdi. Japadan jalǵyz otyryp, áı ózim de bir kúlip, bir jyladym-aý!..
Qazirgi kezde, rasyn aıtý kerek qoı, atys-shabys, qantógis, qyrǵyn tóbeles, qaptaǵan korrýpsııa men mafııany kórsetetin kınolarǵa ábden toıyp bittik. Olardy kórip otyryp, qaraptan-qarap sharshaısyń. О́zińnen óziń qosúreı bolasyń. Aınalańdaǵy adamdardyń bári jaýyz, jemqor, aqsha úshin bas kesýden taıynbaıtyn qaraqshy sııaqty bolyp kórinedi. Tipti bar ǵoı, túnde jalǵyz óziń mal qoranyń art jaǵyndaǵy ájethanaǵa barýǵa qorqasyń. Áne, osynyń barlyǵy búgingi jurtqa, ásirese jastarǵa áser etpeıdi ǵoı dep oılaısyń ba...
Men endi nemere aǵamnyń óz-ózinen ot ala bastaǵanyn sezdim. Aıtyp otyrǵan kúndelikti estip júrgen áńgime sııaqty bolǵanymen, qazaqı sóz lámi, tap-taza maqamy kóńilimdi úıirip-aq barady.
– Baıaǵyda-a Sher-aǵań, aınalaıyn, el úshin týǵan er – Sherhan Murtaza aǵamyz gazetke jazyp edi ǵoı; búgin ekrannan kórgen sumdyqty erteń kósheden kórip júrmeıik, toqtataıyq dep. Áne, sony búgin basymyzdan keship otyrǵan joqpyz ba...
«Iá-á, – dep oıladym meniń de janym kúızelip. – Qaıran Sher-aǵań aıtýdaı-aq aıtty, jazýdaı-aq jazdy emes pe. Biraq bul áńgime búgin bitpeıtin sııaqty kórinedi...».
Sodan soń gazǵa shaı qoıa salaıyn, kelinińiz kelgenshe qaınaı bersin degendi syltaýratyp, asúıge qaraı buryldym. Bir jaǵy nemere aǵamnyń álgi kınodan alǵan áseri men oıyn jınaqtap alǵanyn qalap, sháýgimdegi daıyn sýdy tógip, jańalap quıyp, sirińke izdegen bolyp, biraz kúıbeńdep júrip aldym.
Ol fılm, «Balalyq shaqqa saıahatty» aıtamyn, rasynda da tamasha óner týyndysy ekendigine daý joq. Bul kúnde naǵyz halyq jazýshysy ekendigin uly ýaqyttyń ózi de moıyndaǵan Berdibek Soqpaqbaevtyń osy attas shyǵarmasynyń jelisi boıynsha túsirilgen. Al rejısseri óner álemindegi máńgilik jaryq juldyz – Abdolla Qarsaqbaev. Onyń «Meniń atym Qoja» (ol da B.Soqpaqbaevtyń shyǵarmasynyń jelisi boıynsha), «Qıly kezeńde», «Daladaǵy qýǵyn», «Alty jasar Alpamys» atty fılmderi de eshqashan eskirmeıtin týyndylar.
Tek álgi «juldyz» degen sózdi aıtqanda, kómeıime bir túıir tas turyp qalǵandaı bolǵanyn kórmeısiz be. О́ıtkeni biz búginde «yrshyp júrip án salǵan» shegirtke sekildi toıdan-toıǵa asyǵyp, «mınýsovkamen» óner kórsetýdi ádetke aınaldyrǵan ónerpazdardy da juldyz deı beretin dertke dýshar boldyq emes pe?
Biraq túngi aspandaǵy jaryq juldyzdardyń ne jazyǵy bar? Bizdiń túsinigimizdiń tómendegenine olar kináli emes qoı.
Kenet nemere aǵam meniń shaqyrýymdy kútpeı-aq asúıge ózi kirip kelip, ústel ústindegi hrýstal vazadan bir alma aldy da, tanaýyna taqap ıiskep: «Túh, – dedi kóńili tolmaı. – Kózge ádemi kóringenimen, túk ıisi joq. Alma degeniń, shirkin, alystan burqyrap, hosh ıisi silekeıińdi aǵyzyp turmaýshy ma edi...».
«Pah, pah, – dedim men ázildep. – «Balalyq shaqqa saıahatty» kórip, ishpeı-jemeı toıyp otyrmyn degeniń qaıda».
«Oı, páli-aı, – dedi nemere aǵam asúıdegi oryndyqtardyń birine sylq etip otyra ketip. – Ol naǵyz jan azyǵy ǵoı!».