Elbasy «Nur Otan» partııasy kandıdatynyń Respýblıkalyq qoǵamdyq shtabynyń múshelerimen kezdesip, óńirlik shtab jetekshilerimen selektorlyq keńes ótkizdi.
Qazaqstannyń Tuńǵysh Prezıdenti saılaýaldy shtabtyń jumysyn jiti qadaǵalap otyrǵanyn aıtty.
– Saılaýǵa 7 kandıdat tústi. Bul – elimizde saıası básekeniń bar ekenin aıǵaqtaıdy. Kandıdattar túrli qoǵamdyq toptar men birlestikterdiń múddesin bildiredi. Ár kandıdat elimizdi jáne qoǵamdy damytýdyń óz baǵdarlamasyn usyndy, – dedi Nursultan Nazarbaev.
Elbasy barlyq kandıdattarǵa saılaýaldy úgit nasıhat jáne turǵyndarmen jumys júrgizý úshin birdeı múmkindikter berilgenin atap ótti. Qazaqstannyń Tuńǵysh Prezıdenti shtabtyń Jastar qanatynyń jumysyna toqtaldy.
– Men táýelsizdiktiń alǵashqy kúnderinen bastap jastardy tárbıeleý jáne oqytý máselesine erekshe mán berdim. Bul jumysty jalǵastyra berý qajet. Bolashaǵymyz bilimdi azamattardyń qolynda. Bilikti kadrlar daıyndaı alǵan memleketterdiń ǵana keleshegi jarqyn bolady. Shtabqa tanymal tulǵalardyń – jastar ókilderiniń engenine qýanyshtymyn. Olardyń saılaý naýqanyna qatysýy óte mańyzdy. Jastar Qazaqstan halqynyń eleýli bóligin – 4 mıllıonnan astam adamdy quraıdy. Solardyń bári Táýelsizdik jyldary ósip-jetildi. Jastarymyzǵa zor úmit artamyn, – dedi Nursultan Nazarbaev.
Respýblıkalyq jáne óńirlik shtabtardyń jumysy týraly aqparatty tyńdaǵan soń, «Nur Otan» partııasynyń Tóraǵasy saılaýaldy baǵdarlamany túsindirý úshin atqarylyp jatqan jumystardyń qarqynyn báseńdetpeýdi tapsyrdy.
Elbasy ultaralyq kelisimdi nyǵaıtý, memlekettiń strategııalyq damý baǵytyn dáıekti júzege asyrý qajettigine nazar aýdardy.
Qazaqstannyń Tuńǵysh Prezıdenti ınfraqurylymdy damytý, óńirlerde turǵyn úı salý, halyqtyń az qamtylǵan toptaryn qoldaý, jańa jumys oryndaryn ashý jónindegi memlekettik baǵdarlamalardy júzege asyrý máselelerine de toqtaldy.
– Qazaqstanda jumyssyzdyq emes, kásiptiń tapshylyǵy bar. Sol sebepten birinshi jumysshy mamandyǵyna tegin oqytatyn baǵdarlama ázirlengen bolatyn. Biz jastar úshin barlyq jaǵdaı men múmkindik jasadyq, – dedi Nursultan Nazarbaev.
Elbasy, sondaı-aq, halyqpen tıimdi keri baılanys ornatýǵa baǵyttalǵan «Birge» atty jalpyulttyq aksııany iske asyrý barysyn joǵary baǵalady.
– Partııa barlyq tapsyrmalardyń oryndalýyn baqylaýǵa alýdy qamtamasyz etýi qajet. Partııa jaýapkershilikti sezinýge tıis. Partııanyń HVIII sezinde qabyldaǵan 2030 jylǵa deıingi baǵdarlamasyn oryndaý kerek. Partııa elimizdi jańǵyrtýdyń flagmanyna aınalýǵa tıis, – dedi Nursultan Nazarbaev.
Sońynda Elbasy el ishindegi saıası úderisterdiń erekshe mańyzdylyǵyn atap ótip, barlyq qazaqstandyqtardy aldaǵy saılaýǵa belsendi túrde qatysýǵa shaqyrdy.
– Shtabtyń barlyq músheleri aýqymdy ári mańyzdy jumys atqarýda. Biz jetistikke jetetin myqty komanda qurdyq. Men elimizdiń ıgiligi úshin qyzmet ete beremin. Memleketimizde qos bılikke jol berilmeıtinin atap ótkim keledi. Bárimiz halyq saılaǵan Prezıdentke qoldaý kórsetip, jumys isteımiz, – dep túıindedi Qazaqstannyń Tuńǵysh Prezıdenti.